Parnaarunneqarnissaminut utaqqilluni pinngitsaaleeqqittoq
Angut suliffeqanngitsoq 23-nik ukiulik Nanortalimmi politiinit suli tigummineqarallarpoq, taassuma niviarsiaraq 13-inik ukiulik decemberip aallartinnerani pinngitsaalillugu arneriffigisimavaa.
Angut taanna qaammatini qulingiluani pinerluuteqarsimasut inissiisarfianniissalluni siusinnerusukkulli utaqqisuniititaavoq niviarsiaqqamik ukiukitsumik aamma allamik tamakkiisumik atoqatiginnissimagami, taama AG-mi ullumi saqqummersumi allassimasoqarpoq.
Nanortalimmi politiit ittuat Niels Nyvang Nielsen AG-mi issuarneqarpoq, angut taanna ukiukitsunik kinguaassiutitigut atornerluisarsimasutut arlaleriarluni siusinnerusukkulli unnerluutigineqartareersoq.
Angutip taassuma illoqarfiup iluani angalaartitaanera tupigusuutigineqarsinnaasoq, politiit erseqqissaatigaat, tamannalu peqquteqartinneqarpoq, angut taanna ukiuni arlalinni pinerluuteqartuunini pissutigalugu, navianavissorsuartut taaneqarsinnaanngimmat.
Kingullermik pinngitsaaliisimanera pivoq, inissiarsuup majuartarfeqarfiani. Niviarsiaqqallu pinngitsaalineqarsimanini kanngusuutigalugu oqarsimanngilaq, ullulli arlallit qaangiutereersut ilaquttaminut oqarmat, ilaqutaasa politiinut kalerriutigaat.
