Parlaateqatigiittut

Israelimiut sakkutuuisa marluk timaat Libanonimiit Hizbollah-meersunit ullumi Israelimut utertinneqarput, tamanna Israelimiut Hizbollah-llu sakkutoorisamik timaannik paarlaasseqatigiinnerannut ilaavoq.
Allattoq Elisa Isaksen
juulip 16-at 2008 10:43

Paarlaasseqatigiinnissap aallartinnissaa tikillugu Israelimiut, minnerunngitsumik sakkutuut 2006-imi tigusarineqartut ilaqutaasa, sakkutuut toqutaasimannginnissaat neriuutigigaluarpaat, illerfiilli qernertut marluk Israelimut ikaarunneqarmata neriutaarullutik aliasuppalunnerat tusaaneqarsinnaavoq. Sakkutuut taakkorpiaat timigineraat maanna uppernarsiniarneqarpoq, qulakkeerneqareerpallu Israelimiut namminneq sakkutuut timaat, tigusallu tallimat utertitassatik tunniussinnaanngussavaat.

Tyskeq Naalagaaffinni Peqatigiinni atorfilik aqqutigalugu tigusanik paarlaassiniarneq piviusunngorsinnaasimavoq, tassunga tassa ilaavoq Israelimiut araberit tigusatik tallimat toqutamillu 200-t timaasa Libanonimut tunniutissagaat, Libanonimiut aamma Israelimiut toqutamik timaat utertinniarlugit neriorsuipput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq