Atuagassiap Charlie Hebdop Parisimi aaqqissuisoqarfigisimasaata eqqaani tallimanngornermi savilersortoqarmat inuit marluk ikilerneqarput. Politiit nutaarsiassaqartitsivimmut AFP-mut taama ilisimatitsipput.

Saassussisimasutut pasineqartut marluk politiinit tigusarineqartut, politiit taassuma saniatigut uppernarsarpaat. Saassussineq peqqarniisaarniarnertut misissorneqartoq oqaatigineqarpoq.

Ikilerneqartut tassaapput arnaq angullu tusagassiorfik Premieres Lignes sinnerlugu itinerusumik misissuisartut. TV-qarfik France 2 taama ilisimatitsivoq.

- Angummit Charlie Hebdop aaqqissuisoqarfigisimasaata silataaniittumit saassunneqarput, arnaq France 2-meersoq oqarpoq.

AAMMA ATUARUK Franskit atuagassiaat profiitip muuamaap titartarneqarneranik imaqartumik saqquummersitseqqinnialertoq

Charlie Hebdop aaqqissuisoqarfiata islamisiortunit 2015-imi januaarimi saassunneqarnerani ikiuisimasutut pasineqartut eqqartuussivimmut sassartinneqaleruttortut, Charlie Hebdop Parisimi aaqqissuisoqarfigisimasaata silataani saassussisoqarpoq.

Inuit aqqaneq-marluk taamanikkut toquutaapput. Aviisi Charlie Hebdo quiasaarutigalugu titartakkanik ilaatigut saqqummersitsisarpoq, titartaasartullu Frankrigimi ilisimaneqarnerit ilaat taamanikkut toqutaallutik.

Parisimili tallimanngornermi saassussineq 2015-imi saassussinermut attuumassuteqarsimanersoq pisortatigoortumik oqaatigineqanngilaq.