Parisimi politiit sisamat suleqatiminnit savimmik toqunneqartut
Parisimi politiit qullersaqarfiani politiit sisamat savilisartumik saassussineqarlutik sisamanngornermi ualikkut toqutaapput.
Politiit peqatigiiffiani siulittaasoq, Loic Travers nutaarsiassaqartitsivimmut dpa-mut oqarpoq.
Politiinut saassussisoq politiini atorfeqarpoq, taannalu allaffeqarfimmi atorfeqarluni. Saassussisoq saassussinermi kingorna aallaaneqarpoq toqutaallunilu. Taamaalilluni katillugit tallimat toqutaapput.
Loic Traversip oqarnera naapertorlugu saassussisoq allaffimmini saassussileqqaarpoq kingornalu illorsuami ingerlaalerluni.
AAMMA ATUARUK Franskit politiivisa imminut toqunnerpassuit akiorniarsarigaat
Pisoq politiinit pisortatigoortumik suli uppernarsarneqanngilaq, politeeqarfiulli qullersaqarfiata eqqaa assersorneqarsimavoq.
Parisimi borgmesterip, Anne Hidalgop ”inuit qassiiusut” toqussutigineqartumik ikilerneqarsimasut uppernarsarpaa.
Politiit qullersaqarfiata allaffiani nalunaaqutaq ataatsit eqqaani saassussisoqarpoq. Qullersaqarfiup allaffeqarfia franskit illoqarfiisa pingaarnersaanni, oqaluffissuup eqqannguaniippoq.
Metrot aqqutaat saassussiffiup eqqaaniittoq sillimaniarneq pissutigalugu matuneqarpoq. Angallatinik ilaasartaatinut oqartussat, RATP taama paasissutissiipput.
Franskit nunamut namminermut ministeriat, Christophe Castaner saassussiffiusumukariartortoq, franskit tv-qarfiat taama nalunaaruteqarpoq.