Parisimi imerniartarfiit coronavirusup Frankrigimi tuniluutileqqinnerani matoqqassasut

Coronavirusip Frankrigimi tuniluutileqqinnera pissutaalluni illoqarfiit pingaarnersaanni Parisimi eqqaanilu killilersuinerit sukannernerulersinneqarput. Frankrigip ministeriunera Jean Castex sapaammi unnukkut taama nalunaaruteqarpoq.

Killilersuinerit nutaat marlunngornermi atuutilersinneqassapput, sapaatit-akunnerinilu marlunni atuukkallassallutik.

Neriniartarfiit malittarisassat sukannersut malissinnaagunikkit ammassinnaassapput. Imerniartarfiilli unnukkut nalunaaqutaq qulit tungaannut maannamut ammasinnaasimasut aqagu marlunngornermit matoqqalissapput.

AAMMA ATUARUK Frankrigimi oqartussat Paris matunialeraat

Coronavirusimik tunillatsissimasut Parisimi amerliartoqqilernerat pissutaalluni killilersuinerit sukannernerulersinneqarput. Utoqqaat akornanni tuniluuttoqarnerulerpoq, coronavirusimillu tunillanneqarsimasut akornanni peruluttut amerliartoqqilerlutik.

- Amerliartornerat sapaatit-akunnerata naanerani uppernarsarneqarpoq, ministeriunerup Castexip allattoqarfiata nalunaarutigaa.

Frankrigimi coronavirusimik tunillanneqarsimasut arfininngormat 17.000-nik amerlipput.

Coronavirusip tuniluutilernerata kingorna nalunaaquttap akunneri 24-t ingerlaneranni aatsaat taama amerlatigisut siumorneqarput. Frankrigimi peqqinnissaqarfik nutaarsiassaqartitsivimmut Reutersimut taama nalunaarpoq.