Parisimi eqqartuussineq aallartippoq

Muuamaat ilaarutigalugu danskit titartagaat pillugit eqqartuussineq Parisimi eqqartuussiviit ilaanni ullumi aallartinneqarpoq. Tassa muslimit suliniaqatigiiffiisa kamaatigisimavaat, franskit aviisiisa ilaata, quianartunik saqqummiussisartup, muuamaat ilaarutigalugu titartakkat Jyllands-Postenip saqqummiussai naqeqqissimammagit, taamaattumillu aviisi ajuallatsitsisutut asissuisutullu eqqartuussisunut tunniussimallugu. Aviisiliortut hunnorujulikkaat nunarsuarmit tamarmeersut Parisimi eqqartuussineq malinnaaffigaat:

- Naak titartakkat Danmarkimi puigorneqareeraluartut, Parisimi eqqartuussineq soqutigineqartorujussuuvoq, tassami tv-liortut aviisiliortullu hunnorujulikkaat eqqartuussineq malinnaaffigaat.

Eqqartuussinerup aallartinnerani illersuisut ilisimannittunik nassuiaasitsipput. Pingaarnertut Socialistpartip siulittaasua sassartinneqarpoq taassumalu naqisimaneqarani aviisiliorsinnaanerup pingaaruteqassusia erseqqissarpaa.

Aammattaaq talerperliuniat præsidentimut qinigassanngortitaata telegrammia eqqartuussivimmi atuarneqarpoq. Aammattaaq taassuma naqisimaneqarani aviisiliorsinnaaneq illersorpaa.

Flemming Rosep Jyllands-Postenimeersup eqqartuussinerup naalakkersuinermut tunngatinneqalersimanera erseqqissarpaa.

Aammattaaq Arabiamiu taalliortoq ilisimannittutut apersorneqarpoq. Taanna oqarpoq aviisip Islam saassummagu ajunngilluinnartoq, tassami oqaluttuarisaanermi Islam saassunneqartaannarpoq massakkullu aamma saassunneqaraluaruni sapernavianngikkaa oqaatigalugu. Jan Ewens Parisimiit taama nalunaaruteqarpoq.

Parisimi eqqartuussineq aqagu ingerlateqqinneqassaaq, taava marsimi apriilimiluunniit eqqartuussinermi aalajangiisoqassalluni.