Papua Ny Guineami inuianni aaqqiagiinngissuteqarneq toqoraanertaqalerpoq

Papua Ny Guineami inuianni aaqqiagiinngissuteqarneq toqoraanertaqalerpoq, ikinnerpaamik inuit 20-t toqutaasimasutut nalunaarutigineqarpoq.

Toqoraanerit nunap immikkoortuani Helami illoqarfeeqqani Karidami aamma Petami pipput.

Aallaqqaammut inuit arfinillit Petami arfininngormat qoqassilluni saassussinermi toqutaapput.

Toqutaasut ilaqutaat illoqarfimmut eqqaminniittumut ataasinngornermi akiniaapput. Tamatumanilu inuit 16-init 18-inut toqutaapput. Toqutaasut akornanni naartusortaqarpoq.

- Naggueqatigiit akornanni sorsunnerunngilaq, tassa nunaannarmi illoqarfimmiut imminnut naapillutik sorsunngillat. Qoqassiilluni sorsunnermut assinguneruvoq, toqqortaattutut ilillutik akeqqaminnik qoqassiillutik saassussisarput, politiinspektøri aviisimut Post-Courierimut oqarpoq.

Aaqqiagiinngittoqaleruttornera pissutigalugu amerlasuut angerlarsimaffimminnit qimarngusut nutaarsiassaqartitsivik AP allappoq.

Toqutsisoqarneranut atatillugu tigusaasoqarsimanersoq danskit nalunaaqutaat naapertorlugu pingasunngornermi unnukkut paasissutissaqanngilaq.

Papua Ny Guineami inuanni pinerliffiusimasut ilaqutaasa akiniaallutik saassussillutik nakuusertarnerat nalinginnaasutut ippoq.

Papua Ny Guineami premierministerip James Marapep akisussaasut toqumik pillarneqarsinnaassasut oqaatigaa.