Paornánguup nannut marluk illuaqqap igalaavatigut takuai: Nuummut taama qanitsigisunik takunngisaannarpunga

- Nannunik Nuummut taama qanitsigisunik takunngisaannarpunga. Annilaangalaaraluarlunga misigisaq nuanneqaaq.

Paornánguaq Jessen ippassaq sapaammi ullaakkut takusimasaminik puiguigallartussaanngitsoq taama oqarpoq.

Taanna uinilu sapaatip akunnerata naanerani Nuummit kujammut 20 kilometerit missaannik ungasissuseqartumi, Aakkaanni, Nuup Narsaata eqqaani (Narsaq Avannarleq), illuaqqamiissimapput. Taassuma uia nalunaaqutaq arfineq-pingasut missaanni makikkami igalaakkut itsuarami nanoq arnaviaq piararlu sissamiittut takusimavai.

Aappariit qoorortuuat umiatsiaaqqami sissamiittumiissimavoq – oqarasuaallu angallattagaq illuaqqamiit attaveqarani.

AAMMA ATUARUK Nannup tumerisinnaasaa Nuup eqqaani siumorneqartoq

Aappariit illuaqqap silataani nerisassaateqarsimapput, tamannalu Paornánguup sapersimavaa. Nannummi nerisassat naamagaluarunikkit uteqqissinnaapput. Taamaammat nerisassat piiapallassimavai.

- Tuaviinnaavik anigama sianeriartorlunga, kisianni taqqamanngaanniit uiga suaarpallappoq: Qaa aggileqaat! Qaapallagit.

Illuaqqamit 100 meterinik ungasitsigisumiittut

Nannut illuaqqamut 100 meterit missaannik qanitsigisut, Paornánguaq Jessenip nalilerpaa. Nannulli sangullutik illuaqqap sammiviata illuanut ingerlapput.

- Tungitsinnut ingerlaalermata pissangalaarpunga. Illuaqqamimi aallaaseqaratalu oqarasuaat attaveqanngilaq.

AAMMA ATUARUK Angerlarsimaffimmi ikiortip nanoq niaquatigut marloriarluni aallaagaa

- Uiga piniarnermut nakkutilliisumut sianerniarsarigaluarpoq, taannali attaveqanngilaq. Taamaammat politiinut sianerpoq. Nannummi ulorianarsinnaapput... Nuummi eqqaa angallaviungaatsiartarpoq, Paornánguaq oqarpoq.

- Qanillivallaassappata illup qaanut majuarsinnaallunga eqqarsarpunga. Uigali oqarpoq: Kukikkaaqigamik majuarnissaat ajornarnavianngilaq.

Kaappasinngitsut

Qujanartumilli aallaammik, politiinik illulluunniit qalianut maluarnissaq pisariaqarsimanngilaq.

Nannullu inuup neqaanik illigisaqartunganngillat:

- Aappaa naakkaangaatsiarpoq. Kaappasinngilaq, Paornánguaq Jessen oqarpoq.

Nannut piarallit ukioq naallugu eqqissisimatitaapput aallaaneqaqqusaanatillu. Aalisarnermut piniarnermullu naalakkersuisoqarfik taama paasissutissiivoq.

Nannut taakku marluk Qeqertarsuatsiaani Kangerluarsorummilu sapaatip akunnerani kingullerni takuneqartartuugunarput.