Paneeraq Noahsen kalaallini siullersaalluni nunatsinni nakorsaaninngortoq
Naalakkersuisut Paneeraq Noahsen nakorsaaninngortussatut toqqarpaat. Paneeraq Noahsen inuiaqatigiit peqqissusaannik nappaataanillu immikkut ilisimasalittut aamma ilinniarsimavoq, maannalu nakorsaanertut atorfinissalluni.
Naalakkersuisut tusagassiorfinnut taama nalunaaruteqarput.
Paneeraq Noahsen nakorsaanertut oktobarip aallaqqaataani sulilissaaq. Taassuma Henrik L. Hansen, 2017-imi oktobarip aallaqqaataaniilli nakorsaanerusoq kingoraassavaa. Henrik L. Hansen ukiuni arfineq-marlunni nakorsaaneruvoq, Taassuma nakorsaanertut atorfia marlunngorpat oktobarip aallaqqaataani naassaaq.
Coronavirusip 2020-mi 2021-milu tuniluutilertornerata nalaani tusagassiortunik katersortitsisarnerpassuarni eqqaamassagunarparput.
Paneeeraq Noahsenili aamma ilisimaneqarluarpoq. Coronavirusip tuniluutilertornerata nalaani peqqissutsimut naalakkersuisut arlallit politimesterilu sanileralugit tusagassiortunik katersortitsinerni peqataasarsimavoq, Nunattami Nakorsaaneqarfiani nakorsatut taamani suligami.
Misilittagaqarluartoq
Paneeraq Noahsen Nuummi inunngorlunilu peroriartorpoq, nunatsinnilu peqqinnissaqarfimmi misilittagaqarluarluni. Naalakkersuisut taama ilisimatitsipput.
Napparsimmavimmi nakorsatut, Danmarkimilu Sundhedsstyrelsemi allaffissorluni nakorsatut aamma sulinikuuvoq, inuiaqatigiillu peqqissusaannik nappataannillu immikkut illisimasalittut aamma ilinniarnikuulluni.
- Paneeraq Noahsen maannakkut nunatta nakorsaanertaavatut atorfinitsissinnaagatsigu assut tulluusimaarutigaara. Inuiaqatigiit peqqissusaannik nappaataannillu immikkut ilisimasalittut nakorsaagami, atorfiup isumaginissaanut Paneeraq Noahsen tulluaqqissaartuuvoq, kalaallit arnartaanni siullersaalluni Nunatta nakorsaanerilissallugu, peqqissutsimut naalakkersuisoq Agathe Fontain (IA) oqarpoq.
Taanna maannamut nakorsaanerusimasumut Henrik L. Hansenimut aamma qujassuteqarpoq.
- Periarfissaq iluatsillugu nakorsaanermut soraartussanngortumut, Henrik L. Hansen-imut, qujassuteqarumavunga, ukiorpassuit ingerlaneranni qasusueqaluni suliarpassuinut. Nunatta nakorsaaneqarfiani ilinniartutut atorfiit nakorsanut kalaallinut qulakkeerneqarnissaat Henrik-ip sulinermini pimoorussimavaa, taamaattumillu maanna nakorsaanermik kalaallimik siulliusumik atorfinitsitsisinnaanitsinnut sunniuteqarsimaqaluni, Agathe Fontain oqarpoq.
