Panbomit illuseqqikkusunngillat

Qaasuitsup Kommunia Panbomit illunik piseqqikkusunngilaq.
decembarip 22-at 2010 15:49

Oqaatsuni illut marluk atorneqanngitsut atulersinniarneri ajornakusoorsimavoq - taamallu pisoqaqqissanngitsoq, kommunip sanaartornermut pisortaa oqarpoq:

- Isumaga malillugu suleqataasut tamarmik akisussaaffeqarput, kisiannili akisussaaffik annerpaaq, pisiortuiffitta amigaatitsinnik tikisitsiniarnerat sivisooq peqqutaanerpaavoq, Qaasuitsup Kommuniani sanaatornermut pilersaarusiornermullu immikkoortortaqarfimmi pisortaq, Jan Erik Andersen, oqarpoq. Taassuma Oqaatsuni illut suli iserterfigineqanngitsut pillugit suliaq qanimut malinnaavigisimavaa - pakatsisimaqalunilu.

Sooq illut, Hans Enoksenip Ilulissat eqqaani nunaqarfimmut tunnissutai, suli iserterfigineqarsimannginnersut ersarissumik akisinnaanngilaa.

- INI-p illut naammassitinnagit attartortissinnaanngilai. Illut atorsinnaasutut akuerineqaqqaartussaapput, atortussanillu pisiortuiffimmiit, Panbomit, amigaateqaratta sanaartugassanik suliassinneqartartoq atortussat tikitsinnagit sanaartukkani naammassisinnaasimanngilai, Jan Erik Andersen oqarpoq.

Illut inoqannginnerannut akisussaaffik annerpaaq Panbomiittoq Jan Erik Andersen isumaqarpoq. Maannalu illut iserterfigineqarnissaminnut kiisami piareersimapput, sanaartornermut pisortaq nalunaarpoq. Tamanna kommunip INI-mut qaammatip ataatsip missaa qaangiuttoq nalunaarutigereersimavaa - sulili illut inoqalinngillat.

- Tamannalu naammaginanngitsoq isumaqatigiissutigisinnaavarput. Taama pisoqaqqissanngilaq. Panbomeersunik sanaqqinnianngilagut, Jan Erik Andersen oqarpoq.

Panbomit illunik, Oqaatsuni sananeqarsimasutut ittunik, 20-t missaannik Qaasuitsup Kommunia, Hans Enoksenip naalakkersuisorisimasaannit tunissutaasimasunik, illuuteqarpoq. Tunissutit taakku kommunimut qanoq akisutigisimaneri pillugit ulloqeqqanut radioaviisimi tusagassaqarumaarpoq.