PanAm-2018-imut arfininngornermi ataatsimut makitsisoqassaaq

Amerikap nunavittaani assammik arsarlutik VM-imut anngunniullutik Nuummi juunip ulluisa 16-iannit 24-ata tungaanut unammiuaartussat kikkuunersut maanna paasinarsivoq. Nunat peqataasussat akornanni kikkut imminnut unammissarnersut pillugu aqagu apriilip ulluisa 14-ianni nalunaaqutaq ataatsimut makitsisoqassaaq.
Assi © : Akutaaneq Kreutzmann/Minik Dahl Høegh
Allattoq Mads Lynge
apriilip 13-at 2018 19:35

Kalaallit Nunaat Panam 2018-imik aaqqissuisuussaaq, puljemilu sorlermi inissikkusunnini nammineq toqqassallugu.
Nuummi unammiuaarnerni angusarissaarnerit pingasut nunarsuarmi pissartanngorniunnissami peqataassapput, makitsinerlu Kalaallit Nunaannut tamanna pillugu pingaaruteqassalluni.

Nunanut allanut unammisartut sungiusaasuat Ingi Olsen makitsinissamut pissangavoq:

- Nalunngilarput nunat soorlu Brasilia, Argentina Chilelu aamma pitsaalluinnartunut ilaammata, taamaammat pingaaruteqasssaaq puljemut sorlermut inissinnissarput, nunanut allanut unammisartut sungiusaasuat Ingi Olsen oqarpoq.

Nunat Panam 2018-imut anngunnikut tassaapput Kalaallit Nunaat, Cuba, Canada, Puerto Rico, Uruguay, Peru, Paraguay, Guatemala, Colombia, Chile, Brasilia Argentinalu.

Panam 2018-imut atatillugu makitsinissaq aqagu nalunaaqutaq ataatsimut toqqaannartumik malinnaavigineqarsinnaassaaq.

Nittartakkatsinnut KNR.gl-imut iserluni malinnaaffissaq nassaarineqarsinnaavoq, tassa Kalaallit Nunaanni Assammik Arsartartut Kattuffiata Facebookikkut quppernera iserfigalugu malinnaasoqarsinnaassalluni.

Aamma atuaruk