Copenhagen jazz festivaalimi ullumi ammarneqartussami, arnaq kalaaleq tusarnaartitsisunut ilaasaaq. Tusarnaartitseqataasussarlu tassaavoq Karina Møller, nipilersortartuilu Alaskameersut, Pamyua.
Københavnimi Nunat Avannaamioqatigiit illorsuanni Den Nord Atlantiske Brygge-mi Pamyua tallimanngorpat tulliani tusarnaartitsisussaavoq, tusarnaartitsinissamilu nipilersoriaasertik, nunap inoqqaavisa jazz-annik taaguuteqartippaat.
Pamyua ukiut qulit sinnerlugit nunarsuarmi sumiiffinni arlalinni tusarnaartitsisarluni nipilersortartoqatigeereerpoq. Nipilersortartullu oqaluttuarnerat naapertorlugu, Pamyuap cd-liaa, Madonnap cd-liaanit amerlanernik Alaskami tunisaqartarpoq, Britney Spears-imullu Karina Møller Alaskami assersuunniarneqartarluni.
Bryggen-imi tusarnaartitsinissami aamma 80-ikkunni tusaamaneqarluartoq Mezzoforte tusarnaartitsissaaq.