Pamolit 300-jukkaat Upernavimmit nunaqarfiinillu utertinneqartut

Nakorsaataarniap iisartakkat Pamol-it 300-jukkaat utertippai. Iisartakkat Pamol-it 300-ikkaat iijuminarsarlugit qallikkat poortat ataasiakkaat allanik suuneri ilisimaneqanngitsunik akuneqarsimanerat pissutigalugu utertinneqarsimanerat, Qallunaat Nunaanni Lægemiddelstyrelsip ilisimatitsissutigaa. Naalakkersuisut nittartakkaminni taama ilaatigut allaaserisaqarput.
Allattoq Mads Lynge
februaarip 17-at 2017 19:24

Iisartakkat suuneri ilisimaneqanngitsut kingorna suusut paasineqarput. Tassaappullu iisartakkat Ibumetin 600 mg- Ibuprofen-imik akullit Pamol-itullu anniarisanut annikitsunut atorneqartartut. Nakorsaatit taakku marluk assigiinngitsunik sunniuteqarput kingunerluutigisinnaasaallu assigiinnatik.

Pamol-it iijuminarsarlugit qallikkat amitsukujuujupput qaqortumik qalipaatillit ”PAMOL”-imillu illuagut allannillit. Iisartakkat arlaanni ”PAMOL” allassimanngilaq.

Nakorsaatit pineqartut Kalaallit Nunaanni taamaallaat Upernavimmi nunaqarfiinilu tunniunneqarsimapput.

Nakorsaatinik pineqartunik annikitsunik Upernaviup Peqqissaavianut januaari qaammat nassiussisoqarsimanera, Kalaallit Nunaannut pilersuisup ilisimatitsissutigaa. Nakorsaatit ataatsimoortut aqqanillit  - peqqissavimmi atorneqarlutik, illoqarfimmi innuttaasunut tunniunneqarlutik imaluunniit nunaqarfinnut nassiunneqarsimanerat, napparsimmavimmi sulisunit nalunaarneqarsimavoq.

Upernavimmi nunaqarfiinilu innuttaasunut

Pamol-inik 300-inik imalinnik normumik matuminnga ilisarnaatilinnik batch nr. 11255945 ( 07-2021 sioqqullugu atugassianik), peqaruit iisinak peqqissaavimmut/ nunaqarfimmi nakorsiartitsivimmut uterteqqullugit Peqqinnissaqarfimmit kajumissaarneqarputit.

Ataatsimik arlalinnilluunniit Iisereersimaguit tamannalu pissutigalugu ernumaguit, Upernaviup Peqqissaavianut oqarasuaatikkut 96 12 11 saaffiginnissinnaavutit.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq