Palæstinamiut utikallutik Egyptinimut ikaaqattaarput
Palæstinamiut Egyptenimut killeqarfimmi qarmarsuaq qaartitsiffigisimatsiaannaraat Israelimiut killeqarfiup nakkutiginissaa Egyptenimiunit akisussaaffiginerarlugu eqqaasitsissutigaat. Egyptenimiorpassuilli Gazami palæstinamiut 1,5 milliuunit naalliutsitaanerat avoqqaarimmassuk, Egyptenimi præsidentip Mubarakip Gazamiit isaasut politiinit saassunneqarnissaat pinaveersaarpaa.
– Palæstinamiut sakkulisanngikkunik Egyptenimi nerisinnaapput nerisassanillu pisiniarsinnaallutik taavali utertariaqassapput, Mubarak sakkortusaarani oqarpoq.
Siornatigulli Egyptenimiit Gazamut sakkunik aningaasanillu eqqussuisut nakkutigineqanngippaallaaqimmata Israelimiunit isornartorsiorneqartarput. Maannakkullu Israelimiut qunusaarisutut illutik Gazamiut, perulluliortortaqaqisut Egyptenimiunut akisussaaffigeqqulinngersaarpaat. Ullumi Egyptenimiut politiivi amerlasuut Gazamut killeqarpiup eqqaanut pigaluarput killeqarfilli ammatiinnarallarlugu. Amerikamiunit tusatsiakkat malillugit Egyptenimiut killeqarfik matoqqissallugu neriorsuigaluarput oqaratilli qaqugu matussanerlugu.
