Palæstinamiut kamaqqapput
Jeriko-mi paarnaarussivimmik Israelimiut tiguaanerat Palæstinamiunit akerlerineqartoq, Israelimiut nuannattorsuupput.
Palæstinamiut peqqarniisaarniartartut arfinillit, Israelip eqqartuussiviani sassartinneqassasut, Israel pilersaarpoq.
Palæstinami paarnaarussivik ippassaq Israelimiut sakkutuuisa saassuppaat, paarnaarussallu arfinillit tigusaralugit.
Paarnaarussanik taakkuninngarpiaq tigusinissaq siunertaalluni, sakkutuut naalagaata Ehud Olmert-ip paarnaarussivimmik saassussineq ippassaq ingerlappaa.
Qaammatip uuma naajartulernerani Israelimi qinersineq ingerlanneqartussaavoq, Ehud Olmert-ilu qinigassanngorteqqittussaalluni. Palæstinami paarnaarussivimmik saassussisimaneq Olmert-ip qinersinissami iluaqutigilluassavaa, qinigaalluarnissaalu ilimagineqaleereerpoq.
Paarnaarussat arfinillit pineqartut, Palæstinami Arafat-ip nalaani eqqartuunneqareersimagaluarput, ukiorpassuarnilu paarsaarunneqartussanngorlugit pineqaatissinneqarsimallutik. Jeriko-mi paarnaarussivimmi inissinneqarsimapput, ippassarlu nutaamik Israelimiunit tigusarineqaqqipput eqqartuunneqaqqittussanngorlutillu. Tigusaasunut ilaavoq Israel-ip takornariaqarnermut ministerianik Revi Hamsiivi-mik 2001-mi toqutsisimasutut pasineqartartoq, Ahmed Sadaat.
Palæstinamiut isumaqarput, paarnaarussat arfinillit tigusarineqarsimasut, nunarsuarmi inuit pisinnaatitaaffii pillugit isumaqatigiissutaasunik unioqqutitsinerusoq, Palæstinamiullu isumaqarput tigusaasimasut Palæstinamut utertinneqaqqittariaqartut.
Paarnaarussat arfinillit pineqartut Palæstinamiunit nuannarineqarluartuupput, ministerpræsidentilu Olmert oqarpoq, Israelimiut sakkutuui ippassaq paarnaarussivimmik saassussisimanngikkaluarpata, Israelimiunit inupiluttut isigisaasoq Ahmed Sadaat, ilagisaalu, Palæstinamiunit ippassaq paarnaarussivimmiit anisinneqarsimanissaat ilimanarsimassagaluartoq, taama DR oqaluttuarpoq.
