Palæstinami suliumajunnaarput

Palæstinamiut pisortat suliffeqarfiutaani atorfillit 10.000-likkuutaat arfininngormalli suliumajunnaarput. Hamasikkut marsimi naalakkersuisunngormatali atorfillit aningaasarsisimanngillat.

Maanna naammaginnikkuunnaavipput. Illoqarfimmi Gazami politiitut atorfillit 4-5.000-t missaanniittut akerliussutsimik takutitsipput. DR-ip tusagassiortuata Steffen Kretzip akerliussutsimik takutitsisut malinnaaffigai:

- Politiitut sakkutuutullu atorfillit Gazami aqqusinikkoorlutik qummut eqqarput. Palæstinami naalakkersuisut tunuarniuteqarnissaannik piumasaqarnertik ataatsikkorsuaq nillertarnermikkut suaarutigisarpaat. Naalakkersuisut ataannarnissaanik eqqissisimatitsiniartussat taama akerliullutik ingerlaaqatigiinnerat Palæstinami naalakkersuisunut ilungersuummernanngitsoorunnanngilaq, Steffen Kretz oqarpoq nangillunilu:

- qiviaannarlugit takuneqarsinnaapput aningaasarsineq ajornertik akerliuffigigaat. Akerliusulli arlallit oqaloqatigereerlugit paasinarsivoq fatah-kkut qinersinermi kingullermi ajorsarnertik marsimilu hamasikkut naalakkersuisunngortitsinerannik akerliusut kiisalu nammineq naalakkersuisunngortitserusunnertik anguniaraat, Steffen Kretz naggasiivoq.