Palæstina pillugu ataatsimiipput

Nunat 60-it sinnillit sinniisui Parisimi katerisimaaleruttorput, tamarmillu Palæstinamiunut aningaasanik tapiinissaat ilimagineqarpoq. Nunat aningaasaliisartut ullumi ataatsimiinnerat kangiani qiterlermi eqqissinissaq anguniarlugu isumaqatigiinniarnissat aallaqqaasernerattut isigineqarpoq.
Allattoq Mads Lynge
decembarip 17-at 2007 12:13

Palæstinamiut namminersorlutik naalakkersuisui ingerlaqqissinnaassagunik 30 milliardi koruuninik maannakkorpiaq pisariaqartitsipput. Palæstinamiut naalakkersuisuisa siulittaasuat, Salam Fayad, oqarpoq maassakkorpiaq aningaasat siulliit atorfissaqartilluinnarlugit. Parisimi ataatsimiinneq, qaammammi kingullermi Annapolisimi ataatsimiinnerup malitsigaa, ukiullu kingulliit arfineq marluk ingerlanerini eqqissinissaq anguniarlugu isumaqatigiinniarnerit siullersaralugu. Annapolisimi Israelimiut Palæstinamiullu 2009 angutinnagu eqqissinissaq pillugu isumaqatigiissimassallutik isumaqatigiipput, taamali sivisutigisumik Palæstinamiut inuiaqatigiittut ingerlasinnaassagunik aningaasanik ikiorserneqarnissartik pisariaqartippaat. Palæstinamiut isertitaat agguaqatigiisillugu 1999-imiit 60 procentimik appariarsimapput. Ingammik Gazami palæstinamiut 75 procentii eqqaassagaanni piitsuusorujussuupput. Manna tikillugu USA-p nunanut allanut ministeria, Condoleeza Rise, inatsisartut akuersissappata, 3 milliardi koruuninik palæstinamiunut tunisinissaminik neriorsuereerpoq.

EU aamma 3 milliardi koruuninik palæstinamiunut tunisissangatinneqarpoq.

DR-imiit ilanngutassiaq Ulf Fleischerimit kalaallisuunngortineqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq