Israelimiut sakkutuui Palæstinamiullu Gazap kujasissuani ullumi aporaammata, aallaasinik akersuunnerit ingerlanneqarput.
Israelimiut sakkutuuat tigusarineqarsimasoq aniguisinniarlugu, ullumi aatsaat taamak akersuunnerit sakkortutigisimapput.
Eqqisseqatigiinnissaq anguniarlugu isumaqatigiinniarnerit Egitsinimiunit siuttuuffigineqartoq ingerlanneqaraluartoq, DR-ip Kangiani Qiterlermi aallartitaa Ole Sippel oqaluttuarpoq, eqqisseqatigiinnissaq ilimanarpallaanngitsoq.
- Palæstinamiut oqaloqatigisakka amerlanerit oqarput, sakkutooq tigusarineqarsimasoq, toqunneqapallassimagaluarpat pitsaanerusimassagaluartoq, maannakkullu akersuunnerit pinngitsoortinneqarsimasinnaagaluarput, Ole Sippel oqaluttuarpoq nangillunilu: - Palæstinamiut piumasaraat paarnaarussaasimasut 1000-it iperagaassasut, premierministerili Olmerti isumaqatiginninniarusunngilaq. Olmertili aatsaat taamak ajornartorsiortigilerunarpoq, Israelimiummi isaanni sanngiitsutut isigineqalerusunngilaq.
Isumaqatigiittoqanngippat Israelimiut Palæstinamut isaaqqilernissaat ilimagineqartoq, Ole Sippel DR-imut oqaluttuarpoq.