Palmit naasalerumaarput
Silap pissusaata allanngoriartornerata kinguneranik Danmarki kiatsikkaluttuinnarpat, ukiut 100-t qaangiuppata palmit naasalersussaasut, biologip danskip siulittuutigigaa, atuagassiami Ingeniørenimi taama allaaserinnittoqarpoq.
novembarip 06-at 2008 17:01
Matumani palmit ilaat allunaasassiarineqarsinnaasoq meterinik 12-inik portussuseqalersinnaasoq, nillermut akiulluarsinnaasoq pineqarpoq. Palmi taamaattoq Schweizimi illup iluani naasuutigineqartareerluni maanna silami naasalereerpoq.
- Maanna silap kiatsikkaluttuinnarnerata kinguneranik palmi taamaattoq Schweizip Kujataani Italiallu Avannaani silami naasinnaalereerpoq. Danmarkimi naatinneqartartut orpiit ilaat aamma orpikkat qaqqortariallit ilaat tamaani naaqatigisarlugit, taamatullu Danmarkimi pisoqariaannaavoq, Jens-Christian Svenning, Aarhus Universitetimi ilinniartitsisuusoq oqarpoq.
Palmip taamaattup sila 20 gradinik issittoq anigorsinnaavaa, taamaattumik siunissami immaqa maani naammattoorsinnaalissavarput.
