Pallep suliassani nutaaq tulluusimaarutigeqaa

Palle Christiansenilu tassa aningaasaqarnermut naalakkersuisutut ullumi tunuarpoq. Taannali isumaqarpoq, Air Icelandimik isumaqatigiissutip suliarinera Naalakkersuisoqarfiit ilinniarfigisinnaaqigaat. Taavalu aamma susoqarumaarnersoq qangali nalusimanagu naqissuserpaa,
Allattoq Jens Thorin
marsip 11-at 2011 17:13

- Aningaasaqarnermut naalakkersuisutut ingerlaqqissinnaananga ilisimaqqinnaarsimavara. Aammali ilisimaarisimavara, Naalakkersuisoqarfimmi allammi ingerlaqqissallunga.

Suna arlaalluunniit akisussaaffigilissallugu piareersimasimavunga, aningaasaqarnermut naalakkersuisuujunnaartoq, Palle Christiansen oqarpoq.

- Isikkamik arsaannermut assersuuppara. Manna muminnissamut piffissanngorpoq, taamaaligaangallu sungiusaasoq arsartut nikisissallugit taarsiissalluniluunniit aalajangersinnaavoq. Tassalu Kuupik nikisiterissalluni aalajangerpoq, taavalu arsaanneq naammassissavarput, Palle Christiansen oqarpoq, aperigatsinnilu uninnissamik eqqarsaateqarsimanersoq ima akivoq:

- Unittaatitaqanngilanga.

Maannalu nunatsinni ilinniartitaanerup malunnarluartumik pitsanngortinnissaanik suliaqalissagami tulluusimaarpoq.

- Malunnaatilimmik allanguinissamik anguniagaqartuuvunga, aammalu oqartussaaffinni assigiinngitsuni taamaaliorsinnaallunga. Demokraatini aallartikkattali ilinniartitaanerup eqqummaariffigineqarnissaa sorsuutigaarput, aammalu ilinniartitaanermut immikkut naalakkersuisoqarfeqalernissaa piffissami sivisuumi kissaatigisimallutigu. Piumasarput pivarput. Akisussaaffillu tigusara angeqaaq, uangalu tulluusimaqaanga, Palle Christiansen oqarpoq.

Tassa Air Icelandimut isumaqatigiissuteqarsimanerup Palle Christiansen tunuartippaa.

Taannalu massakkut isumaqarpoq, taanna naalakkersuinikkut aammalu allaffissornikkut ilinniarfissaaqisoq.

- Allanngortitsisinnaanngilanga. Suliassaq tigugakku, isumaqatigiissut allaffissornikkut nammassineqareersimavoq atortussanngortinneqareerlunilu.

Tassalu oqartoqarsinnaavoq, allaffimmiit suliamut uanga sunniuteqarsimanngitsunga. Taamaammat naalakkersuisoqarfimmi qimalikkanni sulisut oqarfigaakka, malitsigisassara aamma taamatut aamma inissittuussanngippat, una ilinniarfigisariaqaraat, aningaasaqarnermut naalakkersuisuujunnaartoq oqarpoq.

Tassami isumaqarpoq Naalakkersuisoqarfimmi aalajanginnginnerminni takusinnaasimasariaqaraluaraat, isumaqatigiissut politikkikkut ajornartorsiortitsilersinnaasoq.

- Tassa suliat tamaasa qiviarlugit imminnut aperiqqusigassaapput, una politikerinit oqqassutaasinnaava? Taamappaallu suliap naammassinnginnerani naalakkersuisunut apuunneqartassaaq. Uanilu taamaliortoqanngilaq, Palle Christiansen oqarpoq.

Aperaarpullu, taama oqarnemermigut, naalakkersusoqarfini pisuutinneraa:

- Naamik, akisussaaffik uanga tigusussaavara, taamaliorpungalu, Palle Christiansen akivoq.

Palle Christiansen ilinniartitaanermut naalakkersuisunngussaaq, aammali ilisimatusarneq nunanullu avannarlernut attaveqarneq akissussaaffigissallugit.