Pallep siunnersuutaa IA-mit isumaqatigineqanngilaq
- Oqallissaarut una, Palle Christiansenip saqqummiussaa, naalakkersuisooqatigiinni tamakkiisumik eqqartorneqanngilaq. Kisianni paasivara, oqallissaarutitut saqqummiukkaa, aammalumi oqallisigineqaleruttorpoq. Uagullu paasitikkumavarput, oqallissaarut isumaqatiginatigu, Inuit Ataqatigiit siulittaasuata tullia politikkimik akisussaaffilik Inatsisartullu ilinniartitaaneq pillugu ataatsimiititaliaani ilaasortaq Juliane Henningsen oqarpoq.
Taavami nunaqarfinneersut atuarfimmi ilikkagakittarnerat aaqqiiviginiarlugu qanoq iliortoqassasoq, Inuit Ataqatigiit qanoq isumaqarpat?
- Arlariisillugit iliuuseqarnikkut taanna aaqqitassaasoq isumaqarpunga. Attaveqatigiinnikkut atortorissaarutit atorlugit ungasianiit atuartitsineq inerisarneqartariaqarpoq. Aamma ilinniartitsisunik angalatitsinikkut atuartitsisarneq maanna misilittagaqarfigineqareerpoq. Aamma atuartut angerlarsimaffii aaqqissuuteqqinneqartariaqarput, inuusuttuaqqat nunaqarfinniit illoqarfinnut atuariartoraangata, tassani atugassarititaasut pitsaangilluinnarmata, Juliane Henningsen oqarpoq.
Taakkua saniatigut Inuit Ataqatigiit isumaqarput, atuartut oqaatsitigut piginnaasaat pitsaanerulersinniarlugit piffissami aalajangersimasumi atuartitsisarneq eqqunneqartariaqartoq, taamaalilluni oqaatsitigut piginnaasakinneq ilinnialernissamut aporfiujunnaarsillugu.