Pallep aningaasaqarneq pillugu oqallittoqarnissaa piumasaraa

Tamanna aallavigalugu Aningaasaqarnermut Naalakkersuisup Palle Christiansen-ip Kalaallit Nunaata aningaasaqarnerata eqqartorneqarnissaa piumasaraa.

Sukkasuumik aalajangiisoqarnissaa Palle Christiansenimit piumasarineqarpoq.

Suut tamarmik akeqarnerat pillugit oqaliittoqarnissaa Inuiaqatigiinni pingaaruteqarluinnarpoq.

Siunissami aningaasakinnerulerutta inuiaqatigiit qanoq aaqqissuunneqassanersut inuiaqatigiit oqallinnissat Palle Christiansenip kissaatigaa.

- Tassa imaappoq Brugseniliaruit aningaasaateqarnak, taava qallersuutit qassit pisiarisinnaavigit? Nul, tassa taama ajornanngitsigaaq, karsimi akiliutissaqanngikkuit, taava aamma kiffartuuneqarsinnaanngilatit. Tassa tamanna amerlasoorpassuit paasisinnaanngisaat, Palle Christiansen isumaqarpoq.

Inuit nuannarineqanngitsunik isummernissanut, aamma politikerit akornanni, peqataajumanngillat.

Innuttaasunit ikittuinnarnit aammalu politikerinit aalajangersakkat nuannarineqanngitsut aalajangerneqartariaqartarput.

Taamaattumik Palle Christiansen naqqissuserlugu oqarpoq:

- Kisianni aamma eqqaamaneqassaaq aalajangiisoqarpat qanoq iliuuseqartoqassanngitsoq allanngortitaqarani, taanna aamma aalajangiiineruvoq kinguneqartussaq.

Naak Aningaasaqarnermut isumalioqatigissitami isumaqaraluartut Naalakkersuisut 2011-mut aningaasanut inatsimmi alloriarneq siulleq aningaasarsiornermut akisussaasutut tigugaluaraat, aqqut suli takeqaaq.

Palle Christiansen-ilu nammineq qanoq iliuuseqarusuppa?

- Assersuutigalugu Deloitte-p peqqinissaqarfik pillugu nalunaarusiaani, ukiut tamaasa 100 millioninik nassaarniartariaqarpugut, taava killiliussat aallaavigalugit iliuuseqartariaqarpugut, taamaanngippat avataanit aningaasat pissarsiarisariaqarpagut.

Palle Christiansenip kiffartuussinermi ajorteriaateqarnissaaq orniginartinngilaa, kisianni akileraarutit akitsuutillu aamma ajornartorsiutaapput.

- Maannakkut inissisimanitsitut imatut iliortoqartariaqarsinnaavoq,

akitsuutit imaluunniit akileraarutit qaffassinnaavagut, taava sulisartut ilinniagaqarsimasut nuussapput, maaniinnissaq pilerinarpallaarunnaassaaq, taava sulisinnaasut ikilissapput utoqqarnut amerlanernut isumaginnittussat.

Taamaattumik kikkut tamarmik Kalaallit Nunaata siunissaanut pilliuteqartariaqarput.

- Imaattoqarsinnaanngilaq gruppit aalajangersimasut ataasiakkaat ileqquusut kulturiluunniit malillugu tapeeqataasassanngitsut, tamatta tapeeqataasariaqarpugut, taamaanngippat anguniagarput angunavianngilarput. Taamaattumik oqallinneq aallartittariaqarpoq inuit tamarmik paasinninniassammata.