Palle: USA-misut pissanngilagut
Taamaaliunngikkaanni, USA-misut pilissasugut aarleqqutigaat, tamanna ajussasutut unnerlugu.
- Aningaasanut inatsisissap tullia, aappaagumut aningaasanut inatsisissamit, ataasinngorpat akuersissutigineqartussamit allaanerussaaq, Aningaasaqanermut Naalakkersuisoq, Palle Christiansen, oqarpoq.
Aappaaguagumi aningaasanut inatsisissaq qanoq allaanerussava? Ileqqaartoqassaqaa?
- Aningaasaliissutinik allanngortitererujussuarnissaq avaqqunneqarsinnaanngilaq. Akileraartarneq atugarissaarnerlu pillugit isumalioqatigiissitat, uanga isumaga malillugu pikkorilluinnartut, erseqqilluinnartunik inassutaat unammilligassallu ornitavut sanileriisikkutsigit, taava susoqartariaqarpoq. Tassalu aningaasanut inatsisissani aggertuni tamanna takuneqarsinnaassaaq, Aningaasaqarnermut Naalakkersuisoq oqarpoq.
Aappaagu aningaasanut inatsisissamut uteqqeriarutta, taava aningaasaqarnermut ataatsimiititaliaq allannguutissatut siunnersuutinik arlalinnik ippassaq saqqummiussaqarpoq. Taamaammallu aningaasanut inatsisissaq oqimaaqatigiissappat, aningaasanik ujarlertoqartariqassaaq.
- Maannakkut allannguutissatut siunnersuuteqarpoq avaqqussinnaanngisatsinnik. Aamma aningaasaqarnermut ataatsimiititaliamiit itigartitsissuteqarpoq avaqqussinnaanngisatsinnik, taakkualu 56 millioni koruunit sinnilaarlugit aningaasartuuteqarnerunissatsinik kinguneqassapput. Maannali ingerlanitsinni aningaasat nassaareqqajaalerpagut. Taakkuali aatsaat pingajussaaneerinninnisatsinni aatsaat saqqummissapput. Tassa aallaqqaammut oqarpunga, aningaasaqarnermut inatsit oqimaaqatigiissasoq, aammalumi taamannak inerneqassaaq, Palle Christiansen erseqqissaavoq.
Tassami Aningaasanut inatsit oqimaaqatigiinngippat, Nunarput USA-tut inissisimalissasoq, Palle Christiansenip aarleqqutigaa.
- Aningaasanik nunanit allaniit atorniassagutta, ingerlatsinermut sanaartornermullu missingersuutit oqimaaqatigiinnissaat atukkiisussat pisariaqartippaat. Tassalu uppernarsarsinnaassavarput, ingerlatsinermut atugassanik atorniarnianngitsugut. Taamaaliunngikkutta USA-misut pissaagut. USA-mimi ingerlatsinermut atugassanik Kina-miit Saudi Arabiamiillu atorniarput, USA-lu nalunngisatsitut aningaasatigut ajutuunngujoorpoq, uagullu taamannak ingerlatserusunngilagut, Palle Christiansen oqarpoq.
Tassalu tamaammat appaagumut aningaasanut inatsisissaq, naalakkersuisooqatigiinni arlaannaataluunnit nuannaarutiginngisaa, ataasinngorpat akuersissutigineqassaaq.
Tassami partiit oqaaseqartuisa ippassaq oqallinnermi saqqummiussaanni tusaaneqarsinnaavoq, aningaasanut inatsisissaq Demokraatit anguniagakiffiususut isigigaat, Kattusseqatigiit Partiaat tusaaneqanngitsutut misigisoq Inuit Ataqatigiillu nuannaartorsuunngitsut.
Palle Christiansenimi qanoq? Aningaasanut inatsisissaq tulluusimaarutigaa?
-Aningaasanut inatsisilioratta, politikkikkut naaperiarnermik ersersitsisumik, tulluusimaarpunga. Isertuussassaanngilaq, Demokraatit Inuit Ataqatigiillu tunngaviusumik isumatsigut assigiinngeqigatta. Kisianni isumaliortaatsigut aporfiginagit oqarsinnaavugut, suut tamaasa pisinnaanngilagut, taava paaseqatigiiffigisinnaasatsigut naapeqatigiinniarta, taava sinnerini aamma naapiffissarsiussaagut, Aningaasaqarnermut Naalakkersuisoq Palle Christiansen naggasiivoq.
