Palle: Tamatta akileeqataasariaqarpugut

- Namminersulerniarluta qinersigatta tamatta nalunngilarput akikinnavianngitsoq, taamaattorli qinerparput. Maannalu akileeqataajumanatik nillialerput tamanna atorsinnaanngilaq.

Palle Christiansen oqarpoq.

Inuit ataasiakkaat pinnagit inuiaqatigiit tamarmik akilleqataaffigisinnaasanik Naalakkersuisut ujartuipput.

- Akileraarutit qaffakkutsigit sulisartut pillarneqassapput, sarfamut akiliut qaffanneqarpat Nuummiut annerpaamik akiliissapput, orsusamillu tamaavitta atuisuugatta taamaasilluta tamatta nammaqatigiissaagut.

Palle Christiansen nassuiaavoq.

Aalisartut piniartullu allaniit eqqugaanerunngillat.

-Assersuutigeriartigu KNAPK-mi ilaasortat ilarpassui angallatitaarnissaminnut atugarissaarnissamut tapiissutinit taperneqarnikuupput.

Kattuffiullu allaffissornertaa aamma akeqarpoq aningaasallu arlaaniit aaneqartussaapput taamaammat qularinngilara aamma taakku inuiaqatigiinni nammaqataarusussasut, Palle Christiansen.

Aningaasaqarnermut inatsit januarip aallaqaataani 2011-mi atuutilersussaq novemberillu naanerani akuersissutigineqartussaq oqimaaqatigiittussatut Naalakkersuisut siunniuppaat.