Palle: Paqumigineqarsinnaasut oqallisigineqarnerulersimapput
Demokraatit Nunatsinni politikkimik ineriartortitseqataasimapput, inuiaqatigiillu pinngitsooratik aningaasarsiorluartuusariaqarnerannut atatillugu oqallinnermut akuulluarsimallutik.
Demokraatit politikkimut akisussaasutut siulittaasup tulliatut maannamut inissisimasimasoq Palle Christiansen taama oqarpoq:
- Politikkimut akuulerninni anguniakkama pingaarnerit ilaat tassaavoq inuiaqatigiinni paquminarsinnaasunik qaqilerinissaq, tamannalu iluatsilluarsimasutut nalilerpara. Meeqqat kinguaassiutitigut atornerlunneqartarnerat akiorniarlugu oqallittoqarnerulernissaa suliniutigiuarsimavara, inuit nunaseriaatsimut ileqqoriligaat, ilaalu ilanngullugit oqallisigineqarnissaannut ilaatigut paqumisuttoqartaraluariarluni tamanna maanna allanngorsimavoq. Inuit arlaatigut ajortumik pineqaratik taakkununnga atatillugu oqaaseqarsinnaanerulersimallutik, Palle Christiansen oqarpoq.
Politikeritullu sulinermini suna imaluunniit suut artornarnerpaasimappat? Palle Christiansen ima akivoq:
- Naammagittarsinnaassuseq ilikkarsimavara. Tamanna ilaatigut ajornakusoortittarsimagaluarpara, tamannali maanna aamma allanngorluni. Inuiaqatigiinni aaqqissuusseqqinnerit maanna aallartippavut. Aaqqissuusseqqinnerit tamakku ukiut qulit matuma siornatigut aallartissimasinnaagaluarpavut. Politikkikkulli taamanikkut tamakku anguneqarsinnaasimanngillat. Pissutsilli maanna allanngorlutik, taama Palle Christiansen oqarpoq.
Demokraatit partiitut sunniuteqarluartutut Nunatsinni inissisimalernissaannut akuulluarsimanini Palle Christiansenip nuannaarutigaa:
- Demokraatit pilersinneqarmata sivikitsuinnarmik atanissaat taamanikkut ilimagineqarpoq, akerlianilli pisoqarpoq, Palle Christiansen oqarpoq.
Naalakkersuisoqatigiinnili inissisimaneq kinguneqapilussinnaavoq, tamannalu ilikkagaqarfigisariaqarparput, isumaqatigiissusiorsinnaasariaqassallutalu, Palle Christiansen oqarpoq.
Taanna Inatsisartunut tulliani qinersisoqalerpat qinigassanngorteqqinniarpoq, partiilli aqunneqarneranut akuujunnaarniarluni:
- Inuit allat aqutsisuulernissaannut piffiassanngorpoq, ikaarsaarnermilu peqataassaanga, suleqataarusullungalu, Palle Christiansen oqarpoq.
Anda Uldum politikkimut akisussaasutut siulittaasup tulliatut inissippoq, Demokraatinilu aaqqissuussaanermut akisussaasunngortoq tassaalluni Michael Rosing. Taassuma Ane Lone Bagger taarserpaa.
