Palle: Nukingertoqanngilaq

- Atugarissaarnermut ataatsimiititaliaq naapertorlugu inerniliinngilanga, Palle Christiansen oqarpoq.

Akileraartarnermut atugarissaarnermullu ataatsimiititaliap oqallinnissamut najoqqutassiaagallartoq maajimi saqqummiuppaa, taamaattumillu Kalaallit Nunaanni Sulisitsisut Peqatigiiffiat isumaqarluni aningaasaqarnermut naalakkersuisoq Palle Christiansen akitsuutit qaffanneqarnissaannik siunnersuuteqarami immaqa pipallappallaarsimasoq, tassami ataatsimiititaliap nalunaarutaa inaarutaasoq aatsaat ukiup affaa qaangiuppat piareersimassammat.

Palle Christiansenilli allatut ajornartumik ikummatissanut akitsuutit maanna qaffattariaqarsimavai, taamaanngippat 2011-mut aningaasanut inatsimmi amigartooruteqartoqassammat.

- Nalunaarusiap ilaa februaarip tungaanut utaqqinneqassappat taava tassani inerniliinerit aatsaat 2012-imut aningaasanut inatsimmi atorneqassapput, tassalu maannakkut siumut sammisumik iliuuseqanngikkutta taava aningaasanut inatsiseqalissaagut amigartooruteqarfiusumik, tamannalu akuersaarneqarsinnaanani, taamaalillutalu aningaasanut inatsisissatut siunnersuut suli oqimaaqatigiissoq aggustimi saqqummiutissallugu, naak aningaasaqarnikkut ajalusoorneqarsimagaluartoq, isumaqarpungalu naalakkersuisoqatigiinnitsinni tamanna ajunngilluinnartoq, Palle Christiansen naggasiivoq.

Siunnersuut novembarip naalernerani ukiakkut ataatsimiinnermi oqaluuserineqassaaq, akuersissutigineqassagunilu 2011-mi januaarip aallaqqaataani atuutilissalluni.