- Ukiut 30-t Siumumi suleqataanikuuvuga. Kisianni erseqqissarpara uani massakkut pisut aallartimmatali Siumuminngaaniit tapersersorneqarnikuunngilanga, Palle Jerimiassen oqarpoq. Assi: KNR

Palle Jerimiassen Siumumiit ilaasortaajunnareerluni: Uteqqissanngilanga

Avannaata Kommuniani borgmesteriusimasoq, Siumumilu ilaasortaasimasoq, maanna attaviitsuusoq, Palle Jerimiassen, Siumumut uteqqinniarnani erseqqissaavoq. Kikkunnillu tamanik suleqateqarnissamik piareeqqalluni taanna oqarpoq.

Palle Jerimiassen kommunimut qinersinerup kingorna Avannaata Kommuniani borgmesteritut ingerlaqqinniarluni ilungersoraluarpoq, qinigaarlaarli parteeqatikualu Minik Høegh-Dam qinerneqarneruvoq.

Borgmesterinngorniarnerlu iluatsinngilaq, Siumumiit anilluni nalunaaruteqarpoq.

Minik Høegh-Dam 406-inik taaguunneqarpoq Palle Jerimiassen 338-nik taaguuneqartoq. Taamaammat Minik Høegh-Dam borgmesteriorusuppoq.

AAMMA ATUARUK Siumut Ilulissat: Tunuliaqutsiiunnaarnitsinnut aningaasat peqqutaapput

Borgmesterinngortinnaguli aaqqiagiinngissutissaqarpoq.

Minik Høegh-Damimi ikiaroornartoq pillugu inatsimmik unioqqutitsisimasutut Nunatta Eqqartuussisuuneqarfiani sassartussaasoq saqqummeqqammerpoq.

Aggustip 24-ani 2018-imi Minik Høegh-Dam-ip inaata ujarlerfiginerani, politiit aningaasat 154.805 koruunit nalingi nassaaraat. Taakkunannga 151.900 koruunit qilertanngortinneqarsimasut isarussat puuiniittut nassaaraat, 2.905 koruunillu aningaasiviani nassaaralugit.

Politiit isumaqarput aningaasat taakku, hashimik 300 grammimit minnerunngitsumit tuniniaanikkut, allatulluunniit inatsisinik unioqqutitsinikkut pissarsiarneqarsimasut. Tamanna allakkami unnerluutiginnissummi allassimavoq.

Siumut Naleqqallu ilisimareeraat

Siumup Naleqqallu suliaq Minik Høegh-Damimut tunngasoq ilisimasimagaat, Palle Jerimiassen oqarpoq.

-Ilumoortoq unaavoq, Siumup gruppiata, Naleqqakkut, Siumup siulersuisuunerisa una pisoq pinngikkallarmalli qinersisoqanngikkallarmalli nalunngereernikuuaat, Minik tamak suliaqarsimasoq, eqqartuusivimmi taamak suliaqartoqartoq.

Palle Jerimiassenip suliaq ilungersunartutut isigalugu Minik Høegh-Dam Avannaata Kommuniani borgmesterissatut piukkunnagu Siumut paasitinniarsimagaluarpaa, tusaaneqarumanngitsutulli misigisimagami Siumumiit tunuartariaqarsimavoq.

-Unneqqarissuseq atorlugu uanga allatut ajornartumik Siumut qimattariaqarnikuuara ilama tapersersunngimmannga, uanga aaliungiusimagakku inuk pineqartoq nalunnginnakku taamak iliorsimasoq, Palle Jerimiassen oqarpoq.

Uteqqinnianngilanga

Suliaq Minik Høegh-Damimut tunngasoq tusagassiuutitigut saqqummiunneqarmat Siumup Ilulissani immikkoortortaqarfianiit taassuminnga tapersersuiunnaarpoq. Tamannalu Palle Jerimiassenip nuannaarutigaa.

-Massakkut allanngoriasaarnera nuannaarutigaara, aamma oqariartuutiga tusaalersimammassuk nuannaarutigaara. Kisianni assannik errortuisoqassanngilaq nalunngereernikuuaat taamanili suna tunngavigalugu taamak sukataartunga.

AAMMA ATUARUK Minik Høegh-Dam hashimut tunngatillugu suliamut oqaaseqarnianngitsoq

Taannali Siumumut uteqqinnissaminut pilersaaruteqarnani KNR-imut erseqqissaavoq.

- Ukiut 30-t Siumumi suleqataanikuuvuga. Kisianni erseqqissarpara uani massakkut pisuni aallartimmatali Siumuminngaaniit tapersersorneqarnikuunngilanga. Aamma taassuma kingorna inuiaqatigiinni annertoorujussuarmik nikassagaallunga assigiinngitsunillu pineqarnerma nalaani Siumut ataatsiarluniluunniit qisuariarfigineqarnikuunngilaq.

- Taamaattumik tamanna peqqutigalugu aalajangiusimalluinnarpara Siumumut uteqqinniarnanga.

Taanna attaviitsutut inissisimanermini allanik suleqateqarnissaminut ammalluni aamma oqarpoq

- Massakkut attaviitsutut inissisimavunga aamma suleqataarusuttut tikilluaqquakka.

Isummersuutit