Palle Jerimiassen: Siumumi aamma inuiaqatigiinni nunat allamiuluarneq qallunaaluarnerlu unitsilli
Oqallissaarilluni taama saqqummiussivoq Qaasuitsup kommunalbestyrelsiani Siumut gruppeani siulittaasoq Palle Jerimiassen.
Taanna isumaqarpoq nunanit allamiuluarneq aamma qallunaanik ilaluarneq sakkortusiartortoq, tamannalu pillugu oqallittoqarnissaq pisariaqalersoq.
Siumup maleruagassaani tunngaviusut ilaat tassalu akaareqatigiinneq uniorlugu sakkortuumik oqallittoqartoq Palle Jeremiassen isumaqarpoq.
- Kalaallit tungaannit ingaasaassilluni nunat allamiunik akerartuerpalaartumik nipeqarluni oqaluttoqarpoq, illuatungaatigullu qallunaatut oqaasillit nikassaarpalaartumik nalunngisaqarnerusutullu nipi atorlugu oqallittarlutik, Palle Jerimiassen oqarpoq, - nipi taanna atorneqartoq naaperiarfissaanngilaq tamannalu akuerisinnaanngilara, Palle Jerimiassen oqarpoq, taassuma oqalliseriaaseq ataqqinninnerusoq paaseqatigiinnerusumillu tunngavililk nanineqartariaqartoq isumaqarpoq.
Ilimanami ataatsimiittarfissualiassamut aningaasaateqarfiup Realdaniap aningaasaliinera nunasiaateqarniartutut nalilerneqarsinnaasoq, Ilimanamilu innuttaasunut pinngitsaaliissummik suliniuteqartitsiniarnerusoq Qaasuitsup kommuneane borgmesteri Ole Dorph oktoberip 14-ani radioaviisimut oqarpoq aamma KNI-imi pisortaanerup soraarsitaanerata kingorna oqallinnermi kalaallit qallunaallu imminnut ungasittut oqallissaarisoq isumaqarpoq.
- Taamaattumik qanoq iliuuseqartoqarnissaanik qangali eqqarsatigisarsimavara maannakkullu oqallissaarummik saqqummiussivunga, Palle Jerimiassen oqarpoq.
Siumut maleruagassaani ilaatigut allassimavoq akareqatigiittoqassasoq. Oqallissaarisorlu isumaqarpoq maleruagassaq uniorlugu oqallittoqartoq.
- Siumut malerugassiaa aallaaviunngivilluni illuatungeriinni sakkortoorujusuarmik atorneqarpoq, taassumalu qaangerneqarnissaa angorusullugu oqallisaarummik saqqummiussisunga, partiitta iluani akuersaaginnassannginnatsigit, akerartuerpalaartumik nipeqarlutik oqaluttut unitseqqullugit oqallinnissamik ammaavunga, Palle Jerimiassen oqarpoq.
Qallunaaluarneq aamma nuna allamiuluarneq Palle Jerimiassenip ulluinnarni sulinermini aamma Siumup iluani tusartuarpaa.
- Ulluinnnarini sulininni tusartuarpara aamma aporfigiuarpara taamaattumik inuiaqatigiinni partiillu iluani oqallineq torersumik oqallisigineqartariaqartoq.
Oqallittarnerup sakkortuup qaangerneqarnissaa oqallissaarisup neriuutigaa.
- Oqallinneq iluaqutaassaasoq isumaqarpunga aamma upperaara taamaalilluni oqallinneq ataqqinninnerusoq pitsaanerusorlu anguneqassasoq.
Palle Jerimiassen Qaasuitsup kommunalbestyrelseani Siumut gruppeani siulittaasoq taama oqarpoq
