ICC-p ataatsimeersuarnera Palle Jerimiassen: - Misigissutsikkut assut qisuariarlungalu nuannaarpunga
Nunatsinni ICC-p ataatsimeersuarnissaanut nunatsinni kommunit pingasut aaqqissuussisuuniarsimapput.
ICC Kalaallit Nunaatalu præsidentiata, Hjalmar Dahlip Avannaata Kommunia aaqqissuussisussanngortoq ippassaq unnukkut nalunaarutigaa.
Avannaata Kommuniani borgmesteri ICC-p ataatsimeersuarnerani peqataasoq Ilulissat 2022-mi aaqqissuussinissamut ajugaanera qanoq qisuariarfigineraa radioaviisimit ullumi aperaarput.
- Misigissutsikkut assut qisuariarpunga aamma nuannaarpunga tulluusimaarlungalu taama suliamik annertutigisumik aaqqissuisussatut tatigineqarluta toqqarneqaratta, taanna suliassatut pissanganartutut aammalu nuannersutut tiguara aamma ICC suleqatigalugu aaqqissuussineq pitsaanerpaamik iluatsinnissaata kivinniarnissaalu siunertaralugu suleqatigiilluta ingerlatissagipput, borgmesteri Palle Jerimiassen oqarpoq.
Borgmesterip Ilulissani unnuiffissanik periarfigissaartoq illoqarfimmilu avataaniit tikittunut nerisitsinerpassuarnik misilittagaqarluartoqartoq minnerunngitsumillu Ilulissani tikeraarnermi pinngortitami asseqanngitsumik misigisassaqartoq, ICC-mi sinniisunut oqalugiarnermini saqqummiuppaa.
- Maaniippunga massakkut ataatsimeersuarneq malinnaaffigalugu aamma ataatsimeersuarnerup Ilulissani ingerlanneqarnissaanut tunuliaqutaqariartorlunga.
- Taamaattumik suliaq annertooq Ilulissanuinnaq tunngassanngilaq, aamma Kalaallit Nunaat tamakkerlugu peqataassaaq aamma kommunitsinni immikkuullarissutsigut kulturikkut Qaanaami, Upernavimmi, Uummannami Ilulissanilu tamarmik ilaatinneqassapput, taamaattumik innuttaasut tamarmik peqataallutik piareersarnerani aaqqissuunnerani ingerlanneqarneranilu peqataatinnissaat pingaartippara taamaattumik tamatta qilanaarutissaqarpugut tamanna nuannaarutigeqaara, borgmesteri Palle Jerimiassen Alaskami nalunaaqutaq malillugu ullaaq tallimat qeqqartoq Radioaviisip itertitaa taama oqarpoq.
ICC-p Alaskami ataatsimeersuarnerani naammasineqaqqammersumi Alaskamit, Canadamit, Ruslandimit nunatsinniillu 430-t pisortatigoortumik peqataapput.