Avannaata kommunianut ilaasortanngortut Uummannami inissitsiterfiusumik tallimanngorpat ataatsimiissapput.Assi: KNR

Palle Jerimiassen Avannaata Kommuniani borgmesteritut ingerlaannassasoq

Inuit Ataqatigiit, Atassut, Demokraatit Naleraq attaviitsorlu Siumut peqatiginagu isumaqatigiissusiorput.

Pingajussaanni iluatsikkunarpaat.

Maannalu tassa Avannaata Kommuniani kommunalbestyrelse inississinnaanngussaaq.

Inuit Ataqatigiit, Atassut, Demokraatit, Naleraq attaviitsorlu ataaseq, tassa Palle Jerimiassen suleqatigiilerput.

Isumaqatigiissusiortut tallimanngornerup unnuaani taama nalunaarput.

IA-mit qinikkat pingasut, Atassummit marluk, Demokraatinit ataaseq Naleqqamiillu marluk. Taakkua saniatigut attaviitsoq Palle Jerimiassen suleqatigiinnut ilannguppoq. Kommunimi partiini anginerpaaq Siumut peqataanngilaq.

AAMMA ATUARUK Avannaata kommuniani suli eqqisiviilliortut: Siumup Naleraq suleqatigiumajunnaarpaa

Taamaalilluni suleqatigiinnissamik isumaqatigiittut ilaasortani 17-usuni qulingiluaallutik amerlanerussuteqalerput.

- Nuanneqaaq, tuppallerneqaaq suleqatissama taama tatingalunga borgmesteritut toqqarmannga, Palle Jerimiassen KNR-imut oqarpoq.

Inuit Ataqatigiinneersoq, Jens Ole Nathanielsen borgmesterimut siullertut tullersortinngorpoq, Naleqqamiillu Anthon Frederiksen aappaattut tullersortinngorluni.

Isumaqatigiissut pingasunik qulequtaqarpoq, taakkulu tassaapput: Aqutsilluarneq ineriartortitsinerlu, isumassuinermik sullissinermi aaqqissuusseqqinneq kiisalu avatangiisigut eqqaaveqarnerlu.

Siumut Nalerarlu suleqatigiinniarlutik atsioqatigeereeraluarput, Siumumeersoq Sakio Fleischer borgmesterissatut innersuullugu, Naleqqamiillu tassunga tullersortimik siullermik inissiillutik. Taakkualu Uummannami tallimanngornermi ataatsimeeqqaartussaagaluarput.

Siumulli Naleqqamik suleqateqarusukkunnaarnini pingasunngormat saqqummiuppaa.

Siumup gruppeani siulittaasup, Jakob Petersenip, Uummannami tallimanngorpat inissitsiterfiusumik ataatsimiinnissami partiimik suleqatissaminnik allamik nassaareersimanissartik naatsorsuutigigaluarpaa.

Eqqissiviilliorneq

Siumut kommunalbestyrelsemi inissani 17-iusuni arfineq-marlunnik ilaasortaatitaqarpoq. Qinersinerulli kingorna partiimi eqqissiviilliorneq aallartinngikkallarmat qulingiluanik ilaasortaatitaqaraluarpoq.

Ulloq manna tikillugu borgmesteri, Palle Jeremiassen attaviitsunngoqqaarpoq. Aamma kommunimi qinerneqarnerpaaq Minik Høegh-Dam borgmesterissatut suaarutigineqaraluartoq parteerisaminit Siumumit anisitaavoq.

Taanna hashimik 300 grammimik oqinnerunngitsumik tuniniagassamik tigumiagaqarsimasutut inatsisaatsuliorsimasutut unnerluutigisaavoq. Minik Høegh-Dam Sermersuup Eqqqartuussiviani marsip 25-ani qineqqusaarnerup nalaani pinngitsuutinneqareerluni, Nunatta Eqqartuussisuneqarfiani sassartussaavoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat