Nukissiorfiit pitsaanerusariaqarpoq, pinngitsoornatik ajutoorneq taamaattoq pigaangat innuttaasunut tuaviortumik aamma ersarissumik nalunaaruteqartarnissaannik, borgmesteri Palle Jeremiassen oqarpoq.Assi: KNR

Palle Jeremiassen: Nukissiorfiit akisussaaffimminnik naammassinninngillat

Uummannami sapaatit akunnerata siuliani sarfaaruttoqarmat, Nukissiorfiit akunnerit aatsaat aqqaneq marluk qisuariarput, tamanna Avannaata Kommuniani naammagineqanngilluinnarpoq.

Uummannami juunip 17-iani akunnernik 24-ngajannik sarfaaruttoqarmat Nukissiorfiit akunnerit aqqaneq marluk qaangiunneranni aatsaat paasissutissiipput.

Tamanna pillugu Avannaata Kommuniani borgmesterip, Palle Jeremiassenip Nukissiorfiit tamakkiisumik paasissutissaatikinnerarlugu isornartorsiorpaa.

- Taamatut inissittarneq siullermiilinngimmat akuersaarneqarsinnaanngilaq. Nukissiorfiit pitsaanerusariaqarpoq, pinngitsoornatik ajutoorneq taamaattoq pigaangat innuttaasunut tuaviortumik aamma ersarissumik nalunaaruteqartarnissaannik, borgmesteri Palle Jeremiassen oqarpoq.

AAMMA ATUARUK Uummannami sarfaaruttoorneq peqqutaalluni innaallagiaqaranilu imeqanngitsoq

Uummannami innuttaasut paasissutissanik pissarserusullutik kommunimut siarngussimapput. Taamaammat kommuni Nukissiorfiup qullersaqarfianut saaffiginnikkaluarpoq, qullersaqarfilli matoreersimammat, naalakkersuisoqarfimmi pisortamut saaffiginnippoq, aamma taanna peqanngilaq. Taava allattaanut Uummannami ajornartorsiutip pillugit saaffiginnittariaqalertut. Palle Jeremiassen oqarpoq.

- Nukissiorfiit akunnerit aqqaneq marluk aatsaat qaangiummata paasissutissiissuteqarpoq. Kanngunaqaaq, Nukissiorfiit akisussaaffimminnik naammassinninngitsut, isumaqarpunga.

Avannaata Kommuniani assingusumik aamma nalaattaqareersut, borgmester oqaluttuarpoq. Ilulissani Tasiusamilu sivisuumik innaallagiaaruttoqarnikuusoq aamma paasissutissiisoqarani, taanna oqarpoq.

Tamannalu erngertumik iliuuseqarfigineqassasoq, Palle Jeremiassen neriuppoq.

- Sarfaaruttoqartillugu Nukissiorfiup pisussaaffigaa innuttaasunut paasissutissiissallutik. Naggaterpiaatigut naalakkersuisut akisussaasuusussaapput, taamaammat Nukissiorfiit pitsaanerusumik iliuuseqarnissaannik kaammattuisariaqarput, Avannaata Kommuniani borgmesteri, Palle Jeremiassen oqarpoq.

AAMMA ATUARUK Nukissiorfiit pisortaat soraartoq: Qamittoornernut attuumassuteqanngilaq

KNR-ip Nukissiorfiit pisortaa Cicilie Senderovitz oqaloqatigaa. Taassuma oqaatigaa nittartakkaminni Facebookikkullu quppernerminni sapinngisartik tamaat paasissutissiisimallutik.

Avannaata Kommuniata borgmesteria Palle Jeremiassen, kommunimilu pisortaaneq Nick Nielsen, ippassaq sisamanngornermi ataatsimeeqatigissallugit Cicilie Senderovitsip oqaatigaa.

Suliap ingerlarnga tassani oqaluuserissavaat, paasissutissiisarnerlu qanoq pitsanngorsarneqarsinnaanersoq aamma eqqartorneqassalluni:

- Paasissutissiisarneq pitsanngorsartuaannarusuppara, Cicilile Senderovitz KNR-imut oqarpoq.

Taassumalu Avannaata Kommuniata borgmesteria, Palle Jerimiassen, sisamanngornermi ullup qeqqqata siorna ataatsimeeqatigaa. Palle Jerimiassenip ataatsimiinnertik iluarisimaaqalugu, KNR-imut oqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl