Palle: CO2-mik aniatitsinermut akiliutit ikilisarneqarsinnaapput

Ilinniartitaanermut Ilisimatusarnermullu Naalakkersuisup, Palle Christiansenip, qilleriffimmut NEEM-imut tikeraarnera silamik eqqumiitsumik misigisaqarfiuinnanngilaq, soorlu ippassaq ulloqeqqaanerani radioaviisimi tamanna oqaluttuarigipput. Nunattali avatangiisinut politikkiata naalakkersuisunit isumaliutigineqaqqinnissaanik eqqarsartitsilerpoq.

Ilisimatuut inerniliussaminnik saqqummiissagaluarpata pissutsit arlaqartut allanngorsinnaasut naalakkersuisooqataasup oqaatigaa.

Silap maannakkutut kissakkiartornera aallarniutaaginnartoq, Sermersuarmi ilisimatuut qilleriviannit, NEEM-imit Palle Christiansen ministereqataalu danskit marluk, Lykke Friis aamma Charlotte Sahl Madsen oqaluttuunneqarput.

Ilisimatuut oqaluttuaraat CO2 silaannartatsinniittoq annertuujugaluartoq, tamanna kinguneqapilutsitsisinnaanngitsoq. Ilisimatuut taama oqarnerat Palle Christiansenip soqutiginartippaa:

- Siornatigumut naleqqiullugu silaannarput CO2-qarnerusoq ilisimatuunit oqaluttuunneqarpunga, tamannalu kingunerlutitsisinnaanngitsoq aamma oqaluttuunneqarlunga. Tamassuma silap pissusaanut paasiniittaaserput allanngortilluinnarsinnaavaa, Palle Christiansen oqarpoq.

Palle Christiansen nammineerluni oqartussaagaluaruni, paasissutissat tamakku Nunatta atorluarsinnaagaluarpaat. Siullertut Ilisimatusarnermut Naalakkersuisup ilisimatusarneq salliutittariaqarpaa, Sermersuarmi ilisimatusarnerit akuerisarlugit. Aappaattullu silap pissusaanut paasinnittaaserput siumut isigisumik allanngortillugu.

- Paasisat kingulliit aallaavigalugit silap pissusaata allanngoriartorneranut paasinnittaaserput tunngavigalugu CO2-mik aniatsitsinitsinni aningaasartuuteqarpallaartariaqarsorinanngilaq. Tamannali oqaloqatigiinnikkut aatsaat allanngortinneqarsinnaavoq, demokratineersoq oqarpoq.

Silap pissutaasa allanngoriartorneranut paasiniittaatsimi allanngorsimannginnera  naqissuserpaa.

- Ilisimatuut saqqummiussaat tusaatissatut tiguinnarpakka, Palle Christiansen naggasiivoq.