Palle Christiansenip atoqqiiniarnera Siumukkormiup iluarinngilaa

Siumup qinigassanngortitaata illut siunertamut naleqqussorinngilai, aammalu nunatsinni ulloq unnuarlu paaqqinnittarfiit illutaasa sinneri iluarivallaarnagit. Illunik pisoqqanik atoqqiineq pitsaasuunngilaq. Taarsiullugu Martha Lund Olsenip nutaanik sanaartortoqarnissaa kissaatigaa.

-Illut Imarsiornermik Ilinniarfiup atorunnaagassaata inuusuttunut innarluutilinnut atuarfittut atussallugit tulluuttuussasorinngilakka. Tamatuma saniatigut aamma atuarfimmi angerlarsimaffinnilu siunissami sulisorineqartussat ilinniarluarsimasuunissaat pingaaruteqarpoq. Atuarfik 20-nik atuartoqassappat najugaqarfiit ikinnerpaamik sisamat pisariaqartinneqassapput, tassanilu angerlarsimaffimmi ulluinnarni isumagisassat ilinniartussaassavaat, Martha Lund Olsen oqarpoq.

Olsen aamma isumaqarpoq kinguaassiuutitigut atornerluisoqannginnissaa pinngitsoortinniarlugu ilinniarluarsimasunik sulisoqartariaqartoq. Ilisimasat takutippaat innarluutillit paaqqinnittarfinni najugaqartut taamatut pineqakkajuttartut. Aammattaaq atuarfimmi ilinniarluarsimasunik sulisoqarnissaa pisariaqarpoq, innarluutillit siunissami naleqassuseqartumik inooqataanissaat anguniarlugu.

-30-40-t missaannik sulisoqarnissaa naatsorsuutigineqassaaq, tamatumani amerlanersaasa isumaginninnerup iluani ilinniarsimasuunissaat pisariaqassalluni. Tamanna eqqarsaatigineqarsimanerluni? Sooq siunertamut naleqquttunik nutaanik illuliortoqarsinnaanngila? Innarluutillit eqqarsaatigineqarpat? Paamiuni inuusuttunut efterskoleqalernissaa/atuarfeqalernissaa innarluutilinnut sutigutr iluaqutissartaqarpa, Martha Lund Olsen aperivoq.