Palle Christiansen: Tamarmik atuinermut akiliuteqartassapput

Tamatumunnga taarsiullugu utaqqiisaasumik ineqartut, soorlu innaallagissamik imermillu atuinerminnik aamma aserfallatsaaliinermut akiliuteqartalissasut, aningaasaqarnermut naalakkersuisup Palle Christiansenip oqaatigaa, naak IMAK-ip siulittaasuata Sivso Dorphip atuinermut akiliuteqartalernissaq utaqqiisaasumik ineqartunut tamanut atuunniissaa ilisimasaqarfiginngikkaluaraa. Palle Christiansen ima oqarpoq:

- Naalakkersuisuni aalajangiupparput, utaqqiisaasumik najugaqartunut, soorlu innaallagissamik imermillu atuinermik akiliuteqartitsisoqartalissasoq. Taamaalilluni utaqqiisaasumik ineqartut atuinerminnik akiliuteqartalerniassammata, Palle Christiansen oqarpoq.

Utaqqiisaasumik ineqartut akiliisinneqartalernissaat siusinnerusukkut pilersaarutaagaluarpoq. Kisianni atuinermut akiliuteqartitsisalernikkut Tuapannguanilu sulisunut nutaanik inissialiornikkut, naatsorsuinerit nutaat ersersippaat, utaqqiisaasumik ineqarnermut akiliuteqartitsinissaq pisariaqassanngitsoq, Palle Christiansen oqarpoq.

- Siusinnerusukkut utaqqiisaasumik ineqarnermut akiliuteqartitsoqartarnissaa oqaluuserineqaraluarpoq. Isumaqatigiissitsiniartarfittali kattuffinik oqaloqateqarnermini paasivaa, kattuffiit isumaqatigiinniarnissani tullerni tamanna pinngitsoorniarlugu piumasaqaateqarniartut. Ilaasalu taamatut aaqqiiniarnerput isumaqatigiissutinik unioqqutitsinertut isigaat. Taamaattumik aaqqiissutissamik akerleriissutaannginnerusumik, aningaasalli isertinniarneqartut amerlaqataannik isertitsiviusinnaasumik, Naalakkersuisunit nassaarniartariaqarsimavugut, Palle Christiansen oqarpoq.

Aningaasallu taakku 4 millionit koruuniupput. Taamatut aaqqiineq IMAK-imi siulittaasup Sivso Dorphip nuannaarutigaa.

Palle Christiansenip oqaatigaa utaqqiisaasumik ineqartut tamarmik - tassa sivikitsumik suliorineqartut taartaasullu kisimik pinnatik - atuinerminnik akiliisinneqartalissasut.

- Utaqqiisaasumik ineqartut tamarmik atuinerminnik akiliuteqartarnissaat pineqarpoq, matumani sumi suliffeqarnersut apeqqutaatinnagu, Palle Christiansen oqarpoq.

Taamatut oqarnera Sivso Dorphip tupaallaatigaa.

- Tamanna suli oqaloqatigiissutiginnginnatsigu taama oqarnera tupaallaatigilaarpara, Sivso Dorph oqarpoq.

Palle Christiansenilli atuinermut akiliuteqartalernissaq tamanut atuutissasoq aalajangiusimavaa.

- Atuinermut akiliisitsisalerniarnerput tamanut atuuppoq, Palle Christiansen naggasiivoq.

Taamatut aaqqiineq ingerlaqqissanersoq imaluunniit utaqqiisaasumik ineqartut akiliuteqartalissanersut Namminersorlutik Oqartussat kattuffiillu ukiamut nalilersuiffiginiarpaat