Palle Christiansen: suliaq politiiniitillugu akuliunnavianngilagut

Taama inerniliineq Demokraatit tungaanniit tupaallaatiginngilarput, Naalagaaffiummi eqqartuussissuserisua arlaannaannulluunniit atanngilaq. Namminersornerullutik Oqartussat Naalagaaffiup eqqartuussissuserisuata misissuinissaanik inniminniisimappata, inerniliinissaq siumut aalajangerneqareertarpoq. Pisoq politiinut maanna tunniunneqareerpoq, suliarlu politiiniitillugu akuliunnavianngilagut, Palle Christiansen oqarpoq.

Politiilli misissuinerat qanorluunniit inerneqaraluarpat, illut pillugit suliaq inatsisinut tunngasuinnaanngilaq, Palle Christiansen isummersorpoq.

-Suliaq annertuumik aamma illuatungeqarpoq, tassalu ileqqorissaarneq. Soorunami ileqqorissaarneq pillugu inatsisiliorsinnaanngilatit, tassanimi qanoq perorsagaaneq inuttullu qanoq pissuseqarneq apeqqutaasarpoq, allassimanngikkaluanilli malittarisassaqartariaqaraluarpoq, tassami inatsisiliortutut maannakkut iliuuserineqartut imaattussaanngillat inatsisiliortumut iluaquseerujussuassallutik, soorlu maanna taama pisoqartoq, Palle Christiansen isumaqarpoq.

Namminersornerullutik Oqartussat illuutai pillugit suliaq Naalakkersuisut namminneq politiinut apriilip naajartornerani suliassanngortippaat.