Palle Christiansen: Paasissutissat Inatsisartunut tunniunneqartussaapput
Naalakkersuisunut § 37 naapertorlugu apeqqutaateqarluni taamaaliorpoq, ilaatigullu paaserusuppaa inatsiseqarnermut pisortap soraarneranut atatillugu ajunngitsorsiassaqartitsinissamik isumaqatigiissusiortoqarsimanersoq.
Minnerunngitsumillu taamaattoqarsimappat, tamanna nunatta karsianut qanoq aningaasartuuteqartitsissanersoq.
Palle Christiansenip Aningaasaqarnermut naalakkersuisoqarfimmi soraarsitsisoqarnera innersuussutigaa, naalakkersuisoqarfiummi pisortaa soraarsinneqartoq milliornerpassuarnik ajunngitsorsiassaqartinnissaanik isumaqatigiissuteqarfigineqarsimammat.
Demokraatip aamma paaserusuppaa, inatsiseqarnermut pisortap soraarneranut atatillugu suliaq pillugu oqaaseqartoqannginnissaanik illuatungeriit akornanni isumaqatigiissuteqartoqarsimanersoq. Taamaattoqarsimappallu, sooq taamaaliortoqarpa?
Aningaasaqarnermummi naalakkersuisoqarfimmi pisortaq soraarsitaammat oqaaseqartoqannginnissaanik isumaqatigiissuteqartoqarsimavoq. Inatsisartunulli tunngatillugu paasissutissanik tunniusseqqusaasoqarsinnaanngitsoq, Palle Christiansenip erseqqissatigaa.
Inatsisartut ombudsmandiata 2008-mi naqissuserpaa, oqaaseqaqqusaannginnermik isumaqatigiissuteqartoqarsimassatillugu, tamanna Inatsisartut imaluunniit Inatsisartuni ataatsimiititaliap suliamut tunngatillugu paasissutissanik piumasaqassappat atuutsinneqarsinnaanngitsoq.
Tamannalu tunngavigalugu Palle Christiansenip soraarnermut atatillugu ajunngitsorsiassat qanoq annertutiginerinik apeqquteqaatiminut, kiisalu Inatsiseqarnermut pisortaq oqaaseqartoqannginnissaanik isumaqatigiissuteqarfigineqarsimappat tamanna sooq pisimanersoq pillugu erseqqissumik akineqarnissani naatsorsuutigaa.
