Palle Christiansen: Nungusaataanngitsumik atuineq paasititsiniaassutiginerusariaqarpoq

Nungusaataanngitsumik ineriartortitsinermut pillugu suliniutit siullerpaartaat ukiut 20-nngortorsiorneqarneranut atatillugu Rio-mi ataatsimeersuartoqarnerani Nunat Avannarliit siunnersuisoqatigiivisa politikkikkut suliniutigisimasaata sammineqarnerani akuunissani pingaartissimavaa:

- Nungusaataanngitsumik atuinermut tunngasunut nunat avannarliit siuarsimanerujussui malunnarpoq. Ilami nunat siuarsimasunik taagukkatta ilaat tamatuminnga ajornartorsiuteqarput, tassami assersuutigalugu Brasiliamiut orpiit nungusaataanngitsumik killukkat ilisarnaasersorniarneri nalorsaatigaat. Taamaariarmat uagut taamatut ilisarnaasersueriaatsinik nunani avannarlerni atukkatsinnik taakkununnga ilitsersuutigisinnaalluarpugut. Palle Christiansen oqarpoq, nungusaataanngitsumillu inerisaanerup isumaanik paasititsiniaanissaq - aamma nunatsinnut atatillugu - tulluartuusoraa:

- Nungusaataanngitsumik atuinissamik isumamik paasititsiniaaneq tamanut - aamma nunatsinni - atugaalertariaqaraluarpoq, assersuutigalugumi meeqqanut paaqqinnittarfinnili ilitsersuutigineqalereersinnaavoq, meeqqallu isumamut paasinnittaasaat sapinngisamik siusinnerpaamik inerisarneqartariaqarluni. Palle Christiansen oqarpoq, Rio-milu ataatsimeersuarnerup angusaqarfiuallaarsimannginnera uggornarnerarlugu:

- Rio-mi ataatsimeersuartoqarmat nunarput maligassiuisutut Helle Thorning-Schmidtip nersualaarmagu qujanaraluaqisoq iluamik angusaqartoqannginnera uggornarpoq, tassami issittup immikkut taaneqarnissaa kiisalu nunat inoqqaavi aamma ilanngunneqarnissaat kissaatigisimagaluaratsigu, Palle Christiansen oqarpoq.