Palle Christiansen: Isumaqatigiinniarnerit ajornakusoorput

Ilinniartitaanermut Naalakkersuisoq Palle Christiansen, Aningaasaqarnermullu Naalakkersuisoq Maliina Abelsen, Nunarput sinnerlugu Rio de Janeiromi ataatsimeeqataapput, Palle Christiansenilu naapertorlugu soqutigisaqaqatigiit amerlaqimmata isumaqatigiinniarnerit ajornakusoortut.

- Silap pissusaata allanngoriartornerata akiorniarneqarnissaa pillugu Nunani assigiinngitsuni ataatsimiittoqaraangat isumaqatigiinniarnerit ajornakusoortarsimaqaat, soorlu Riomi ataatsimiinneq aamma taamaattoq. Nunat anginerit immikkoorniarsaripput, nunallu ineriartorfiusut immikkoorniarsaralutik, soorlu aamma nunat pissakinnerusut immikkoortut. Taamaattoqaraangat piumasaqaatigineqartut assigiinngitsorpassuusarput, nunat assigiinngitsut piumasaqaatitik saqqummiuttaramikkit, isumaqatigiinniarnerillu ajornakusuulersittarlugit, Palle Christiansen oqarpoq.

Aatsitassarsiorsinnaanissaq Nunatta sorsuutiginiarpaa, piujuaannartitsinissarli eqqarsaatigalugu tamanna pissusissamisoornersoq, nunat allat apeqquserpaat, oqallisigineqaqaarlu, Palle Christiansen oqarpoq.

- Aatsitassarsiorneq qanoq ililluni piujuaannartitsinermut attuumassuteqarnersoq inuit ataatsimeeqataasut apeqqutigisarpaat, Nunattali aningaasarsiornera siunissaq eqqarsaatigalugu isumannaarneqassappat aatsitassarsiorneq pingaaruteqarpoq, tamannalu avammut saqqummiunniarsaraarput, Ilinniartitaanermut Naalakkersuisoq Palle Christiansen oqarpoq.

Kisianni soorlu oqaatigineqareersoq, nunat assigiinngitsut assigiinngitsorpassuarnik soqutigisaqarput, angorusutaqarlutillu, isumaqatigiinniarnerillu tamanna pissutigalugu ajornakusoorsinnaallutik.

Rio de Janeiromili ataatsimiinneq pisortatigoortumik aqagu iluamik aatsaat aallartissaaq, nunat assigiinngitsut siuttui isumaqatigiinnialissammata.

Naallu isumaqatigiinniarnissat ajornakusuussagunaraluartut, Palle Christiansen isumaqarpoq Rio de Janeiroliarluni ataatsimiigiarneq asuliinnaanngitsoq.

- Nunarsuaq tamakkerlugu piujuaannartitsinissaq pillugu ilungersuuteqarneq matumani pineqarmat isumaqarpunga maani Riomi ataatsimiinneq pingaaruteqartoq. Kinguaariit tulliuttut eqqarsaatigisariaqarpavut. Maani Rio de Janeiromi ukiut 20-t matuma siornatigut aamma ataatsimiittoqarpoq, angusaqarfiusumik. Tamanna takutippaa iliuuseqartoqarsinnaasoq, isumaqatigiinniarnerillu iluatsiffiunissaat neriuutigaarput, Ilinniartitaanermut Naalakkersuisoq Palle Christiansen oqarpoq.

Palle Christiansenip saniatigut Aningaasaqarnermut Naalakkersuisoq Maliina Abelsen Rio de Janeiromi ataatsimiigiaqataavoq.