Palle Christiansen: Innuttaasunut annernarsinnaassaaq

Aamma saqqummiussinermini arlalitsigut annernassasoq oqaatigaa.

Namminersorlutik Oqartussani kommuninilu allaffissornikkut sipaarniuteqartoqarnissaa anguniarneqarpoq aamma nunatta karsianut isertitsiffiusussanik ujaasisoqarniarluni. Erseqqisumillu oqaatiginngilaa aningaasanik suminngaanneerpiaq aallertoqassanersoq.

Siunnersuutit ilagaat avataasiorluni aalisarnermut 2010-miit isumalluutinik pissarsianik akiitsuuteqartitsilernermit aappaagumiit isertitsissuteqartoqarsinnaanera.

Aamma 2011-miit Naalakkersuisut ukiumoortumik 45 millioni koruuninik isertitassatigut sillimmatinik immikkoortitsisimapput, tassa ukiortaaq 2011 aallarnerfigalugu akitsuuteqanngitsunik tupanik imigassanillu aalakoornartulinnik eqqussuisarnerup unitsinneqarnissaa siunertaalluni.

Allatut oqaatigalugu, Palle Christiansenip, nunatta karsia isertitaqarneruleqqullugu tupanik imigassanillu akitsuuteqanngitsunik eqqussisinnaaneq unitsinniarpaa.

Taakku saniatigut akileraartarnermut inuulluarnermullu kommissioni akitsuusiinissanut allanut tunngasunik siunnersuuteqassaaq. Siunnersuutit inuunermut oqimaaqatigiissinneqarsimasuussapput avatangiisillu eqqarsaatigalugit ilumoortumik pissusilersornissamut kaammattuutaassallutik.

- Siunissami akitsuutitigut aaqqissuussineq unammilligassanut aaqqissuussimasatsinnut naapertuutissaaq, aammalu avatangiisinut silamullu tunngatillugu erngup nukinganik annertunerusumik atuineq aamma silaannarmut suliniutit arlallit naleqqunnerusut atulissasut, Palle Christiansenip erseqqissaatigaa.

Inaarutaasumik aningaasanut inatsisissatut siunnersuut tamakkiisoq septembarip ulluisa 30-anni saqqummiunneqassaaq.