Palle Christiansen (D): Qilalukkat nungunniaannarneqarsinnaanngillat

Qilalugartassat amerleqqinneqarnissaanik Kommunit arfineq pingasut ataatsimoorlutik Naalakkersuisunut allagaqarnerat, Palle Christiansen-ip Demokraatineersup qiusariaateqarfigaa.

- Uumasut nungoratarsinnaasut ilagaat qilalukkat qaqortat qernertallu, taamaammat nungusaataanngitsumik piniartarnissaq anguniarlugu killilersuisoqalerpoq, Palle Christiansen Demokraatineersoq oqarpoq.

Qilalugartassat ilaqqinneqarnissaanik qinnuteqartumik kommunit arfineq pingasut, ataatsimoorlutik Naalakkersuisunut allannerat Naalakkersuisunngorlaanit tusaaniarneqassappat, nungusaataanngitsumik piniartarnissamik assortuisoqalissasoq Demokraatit oqaaseqartartuat Palle Christiansen isumaqarpoq.

- Qilalukkat tuugaavinik sanalukkat aningaasarsiutitut EU-mut eqquteqqusaajunnaarnikuupput, tassani EU isumaqarmat qilalukkat nungoratarsinnaasut Kalaallit Nunaanni piniarneqarpallaartut.

Palle Christiansen aamma isumaqarpoq biologit pisassiissutissatut siunnersuutaat tusaajumaneqartassanngippata assigiinnassagaa aningaasarpassuit sipaarlugit, biologit suliunnaarsiinnaraanni.