Palle Christiansen: ataatsimortumik tapiissutit allanngortinnagit
Kalaallit Nunaannut ataatsimoortumik Danmarkimiit tapiissutit tunniunneqartartut erniaqangitsutut taarsigassarsiatut allanngortinneqarnissaat, taakkualu Kalaallit Nunaata naqqaniit ikummatissanik qalluinikkut isertitanik sinneqartooruteqartalerpat akiliioraanerup ingerlanneqalerumaarneranik, Dansk Folkeparti eqqartuilersorlu, Palle Christiansen tusagassiutinut taama allappoq.
-Kalaallit Nunaat naalagaaffeqatigiinnermut ilaammat naluneqanngilaq, taamaammallu ikummatissamik Nordsø-p naqqaniittumut aamma piginneqataavoq, Savalimmiuttaaq matumani piginneqataapput. Tassa imaakkaluarpoq ikummatissamit Nordsø-p naqqanit qallorneqartumit sinneqartoorutinut Kalaallit Nunaat piginneqataasoq, uangalu paasinninnera naapertorlugu aningaasanik nammineq pigeriikkanik attartortoqarsinnaanngilaq, Palle Christiansen allappoq.
Danmarkimi maanna eqqartorneqalerpoq danskit naalagaaffiata aningaasivia ikummatissamit Nordsømi qallorneqartumit isertitanit annertunerusunik pissarsiaqalernissaq. Tamannalu suliffeqarfiit ikummatissamik qalluisut nutaamik isumaqatigiinniarfiginerisigut pissasoq. Tamatumunnga atatillugu neriuutigaara isumaqatigiinniartoqalerpat Christian Thulesen Dahlip, danskit Aningaasaqarnermi Ataatsimiititaliaani ilaasortaasup, Kalaallit Nunaat eqqarsaatigiumaaraa, tassami ikummatissamut Nordsømeersumut Kalaallit Nunaat aamma piginneqataammat, Palle Christiansen allappoq.
Tamanna tunuliaqutaralugu Palle Christiansen isumaqarpoq, ataatsimoortumik tapiissutit allanngortinneqassanngitsut, qaffanneqassappat aatsaat allanngortinneqarsinnaammata.
