Palle Christiansen apeqqutissaqarpoq
Apeqquteqartarfimmut apeqqutit Ineqarnermut ataatsimiititaliami oqaluuserineqassapput.
KNR-ip naalakkersuinermut tunngasunik apeqquteqartarfia Inatsisartut Ineqarnermut ataatsimiititaliaani oqaluuserisassamik pilersitsivoq. Tassa ataatsimiititaliap tullianik ataatsimiinnissaanut attartortuunermiit – piginnittuulernissamut aaqqissuussineq oqallisigineqassammat.
Apeqquteqaatisi tunngavigalugit Demokraatit sinnerlugit inatsisartuni ilaasortaq, Palle Christiansen, Inatsisartut Ineqarnermut ataatsimiititaliaata tullianik ataatsimiinnissaanut apeqquteqarniarpoq.
Apeqqutit pingasut tassaallutik:
1) Attartortuunermiit-piginnittuunermut aaqqissuussineq nunatsinni illoqarfinni nunaqarfinnilu illuliornermut atatillugu aningaasanik attartortitsivigineqarsinnaanngitsuni, soorlu Qasigiannguani qanoq ililluta qulakkiissavarput?
2) Maanna attartortuunermit-piginnittuunermut pisut, tassa politikerit atorfillillu qulliunerusut akikinaarlugu illusisimanerat. Tamanna tunissutitut/soraarnerussutisiatut isigineqarsinnaava? Suliap ingerlanneqarnera atorfimmik atornerluinertut isigineqarsinnaava, tassami imminut salliutinnertut isigineqarsinnaammat?
3) Aaqqissuussineq qanoq iliorluta Inatsisartunit sukannernerulersissinnaavarput?