Palle Christiansen: Aningaasanut inatsimmik kusassaasoqanngilaq
Nukissiorfiit aningaasat atugai siunnersuummi ilaatinneqanngimmata kisitsisinik kusassaanertut taaneqarput, tamannali Aningaasaqarnermut Naalakkersuisup Palle Christiansenip nikeriallaatiginngilaa.
- Kisitsisit naatsorsorneqarnerinut atatillugu periuuserisarput siornatigut aamma periuuserineqartarpoq. Kalaallit Nunaata aningaasaqarnikkut sinneqartoornissaa siunertarivarput, kisitsisinilu tamanna aamma takuneqarsinnaavoq.
Aleqa Hammondip oqariartuutai aamma ilumoorput, kisitsisinimmi tamakkiisumik misissuataarigaanni taava amigartooruteqassaagut, kisianni inatsisartut erngup nukinga atorlugu nukissiorfiliortoqarnissaa akuerinikuummassuk taamatut isikkoqarpoq, Palle Christiansen oqarpoq.
Siumut siulittaasuat Aleqa Hammond isornartorsiuinermini oqarpoq, inatsisitigut aningaasartuutissat, soorlu Nukissiorfiit aningaasat atugassaat inatsisissatut siunnersuummi ilanngunneqarsimanngitsut, tamannali paatsuuinerusoq Palle Christiansen oqarpoq.
- Aleqa Hammondip paaatsuuineranik tamanna aallaveqarpoq, inatsisitigut akuerineqartut aningaasartuutigineqartussat tamarmik allaqqapput, tamannalu tusagassiuutinut septembarimi nalunaaruteqartoqarlerpat annerusumik paasisaqarneruffigisinnaavaa, Aningaasaqarnermut naalakkersuisoq Palle Christiansen oqarpoq. Nassuiaallunilu kontot tamarmik pisarnermisut allattorneqassasut, taakkunanilu ingerlatsinermi aningaasartuutit kiisalu inatsisitigut akuerisatut aningaasartuutissat tamarmik allaqqassasut.
Inatsisitigut aningaasartuutissat ilanngunneqarsimanngimmata, amigartoorutissat annertunerujussuunissaat Aleqa Hammondip oqariartuutigaa. Naalakkersuisulli Kalaallit Nunaata aningaasaqarniarnerata aqunneqarnera amigartooruteqanngitsoq saqqummiunnissaa pingaartippaat.
- Kalaallit Nunaata ingerlanneqarnera amigartoorutaaffiunngitsoq saqqummiunnissaa pingaatissimavarput, tassa imaappoq Kalaallit Nunaanni atugarissaarneq pillugu ingerlatsineq. Ingerlatsivinnullu aningaasat atukkiunneqartussat ilanngaatit tamaasa peereerlugit qiviarutsigit, taava aningaasaqarnermut inatsit amigartoortoqartussatut isikkoqalissaaq, taamaasillunilu aningaasat tigoriaannaat aqunneqarnerat qiviarutsigut aamma takusinnaavarput nunatta karsianit aningaasat suli tammagarmata. Tamannalu peqqutigalugu nunanut allanut aningaasanik atorniarpugut, taakkualu nukissiorfiit atussavaat. Nunattami karsiani Namminersorlutillu oqartussat aningaasanik atorniarsinnaanerat Nukissiorfiit atorniarsinnaaneranut sanilliullugu akikinneruvoq.
- Nukissiorfiit nammineq nunanut allanut atorniassagaluaruni erniakkaanik atorniassaaq, tamannalu atuisunut akisuumik kinguneqarsinnaalluni, uagullu erniakinnerusunik atukkiussisinnaavugut, atuisut akikinnerusumik akiginiarfigineqarnissaat Naalakkersuisoqatigiiusugut anguniagaraarput, Palle Christiansen oqarpoq.
