Palle Christiansen: Aningaasanik nassaassaqqaarpugut
Naallu amigartooruteqatoqartussaagaluartoq aammalu inuuniarnermi atukkat pitsanngorsarneqarnissaat aningaasanik akeqartussaagaluartoq, aningaasat nassaarissaqqaarlugit oqarpoq. Taamaattorli aningaasaqarneq Naalakkersuisutut tunuartut qimataat tulluusimaarutissaannginnerarpai.
- Aningaasaqarneq ingerlalluartoq qineqqusaarnerminni oqaatigisaat naammassineqarsimanngilaq pissutigalugu, tamanna maannakkut taamaanngimmat, kisianni taamatut ilersissavarput. Ukiuni marlussunni kingullerni Nunatta Karsiani putorpassuit annertuut pilersinneqarsimapput, taamatut Palle Christiansen.
- Qanorli ililluni aningaasaqarnermi putut immersorneqassappat?
- Pisortatigoortumik aningaasaatitta 31 procentiisa missaat pisortatigoortumik tapiissutigineqartarput, soorunami misissussavarput ilumut pisariaqarnersoq inuussutissarsiutinut imminut akilersinnaanngitsunut imaluunniit uagutsinnut Kalaallit Nunaannut pitsaanerua taakkua ineriartorfiusinnaasunut nuukkutsigik, taamaalilluta suliffiit nutaat pilersissagatisik, malugaluguli suliffeqarfiit imminnut akilersinnaasut.
Naalakkersuisunngortussat aammattaaq aningaasatigut isertitaqarfiusinnaasut qimerluussavaat. Tamatumanilu pinngortitap pisuussutai soorlu aalisakkat aatsitassallu akitsuuserneqarnissaat piukkunnarluarpoq, Palle Christiansen isumaqarpoq:
- Soorlu pisuussutit uumassusillit eqqartussagutsigik, soorunami taakkua pingaarnerusumik raajaninngaanneersuussapput, aammattaarli pisuussutinit uumassusilinnit allanit. Tamatumanimi akiliutissaqarnerussaagut atuinerminngarnit. Uumassusilinnilli pisuussutaanngippata, taava aatsitassarsiorneq Kalaallit Nunaanni pissarsinarnerussaaq taakkua nalingisa Kalaallit Nunaannit anninneqarneranninngarnit.
- Taakkua aningaasaanngorlugit qanoq naleqarpat?
- Taakku tassaapput ulluni marlussunni aggersuni misissugassavut.
Nunattali Karsiata amigartoorutaasa qaavatigut aamma nunap tunisassiaasa tamarmiullutik nalingat 2 procentimik appassasut ilimanarpoq, taamaattorli Palle Christiansen isumalluarpoq.
- Ullumi atuarpara, Amerikami aningaasaqarnermut immikkut ilisimasallit maanna ilimagilereeraat tamanna 2010-mi allanngoreersimassasoq. Tassami nalunanngimmat aningaasaqarnikkut ajornartorsiorneq USA-mi, taava ilimagaarput USA-mi ilorraap tungaanut ingerlasoqalerpat, taava tamanna nunarsuup sinneranut tuniluukkumaartoq. Taamaalilluta isumalluarpugut taamatut allanngoriartorneq killormut saassappat.
