Palle C: Qinngarinninneq Inatsisartuni isumaqatigiittoqarsinnaannginneranut pissutaavoq

Inatsisartuni oqallittarneq ilaatigut sakkortusinnaasoq nalunngilarput, partiillu angisuut marluk SIumut aamma Inuit Ataqatigiit qaquguussagaluarnersoq naalakkersuisoqatigiilersinnaanissaat inatsisartuni ilaasortaasimasup Palle Christiansenip takorloorsinnaanngilaa, arlaatigulluunniit isumaqatigiissusiorsinnaanissaat aamma ajornakusuussanerarlugu. Pissutsit taamaaginnassappata nunatsinnut iluaqutaanavianngitsoq, Demokraatit sinnerlugit Inatsisartuni ilaasortaasimasup oqaatigaa:

- Kuupik V. Kleistip Aleqa Hammondilu akornanni qinngarinninneq ima sakkortutigaaq taakku naalakkersuisoqatigiissinnaanissaat ajornarluinnartoq. Partiillu taama angitigisut isumaqatigiissinnaassanngippata, nunatsinut iluaqutaasinnaasussanik isumaqatigiissusiortoqarsinnaanavianngilaq, nunattalu nunanit tamalaanit isiginiarneqarnera innarlerneqarsinnaavoq, Nunatsinnilu aningaasaleerusussinnaasut immaqa ikittuinnaassallutik, Palle Christiansen Politikenimut oqarpoq.

Politikenip Kuupik V. Kleist oqaloqatiginiarsimagaluarpaa, iluatsissinnaasimanaguli. Inatsisartunili Folketingimullu ilaasortaq Sara Olsvig oqaloqatigineqarsimavoq, Palle Christiansenillu oqaasii taassuma ilumoortortaqarnerarpai.

- Politikerinik Kalaallit Nunaanni maanna qatsussisoqartoq malunnarpoq, partiillu angisuut marluk ilaatigut qatsunneqartut malunnarluni. Uagullumi aamma taamaappugut, Sara Olsvig Politikenimut oqarpoq.

Partii Siumut suleqatigineqarnissaa ajornakusoorsinnaasoq, politikerit taakku marluk isumaqatigisorujussuuaat, inatsisartunili maanna qinikkat suleqatigiilersinnaanissaat, Sara Olsvigip ilimaginngilaa:

- Partiini taakkunani marlunni kinguaariinni nikittoqareerpat aatsaat immaqa suleqatigiilertoqarsinnaassaaq. Partiit taakku marluk akornanni isumaqatigiinnginneq partiit aqutsisui akornanni pinngorsimavoq, siuttut Kuupik aamma Aleqa kisiisa pinnagit, kisianni partiit ataatsimut isigalugit siuttuisa akornanni, Sara Olsvig, Politikenimut oqarpoq.