Palle C. oqarasuarnermik ingerlatseqatigiiffimmik pilersitsisoq
Politikeriusimasup maannalu kigutit nakorsaattut atorfeqartup Tele-Postimi sulisuusimasut misilittagartuut marluk suleqatigigai aviisimi allaaserineqarpoq.
Oqarasuarnermik neqerooruteqartarneq politikerinit tamanut ammaanneqassappat Tele-Postimut unammillernissartik anguniagaraat.
Tamanut ammaassinissamik pilersaarutit maanna uninngatikkallarneqarput, inuiaqatigiinnut aningaasaqarnikkut sunniutigisinnaasaanik misissueqqissaarisoqarnissaa Naalakkersuisunit suli utaqqineqarmat.
Ingerlatseqatigiiffiup oqaaseqartartuata - Palle Christiansenip - oqarasuaatinik angallattakkanik atuinermik akikinnerusumik pilersitsisoqarsinnaanera ilimagilluinnarpaa:
- Pisortaqarpugut Telep iluani akinik aalajangersaanermik aammalu niuerfimmik ilisimasaqarluartumik.
- Taamaammat aamma ilisimavarput oqarasuaatinik angallattakkanik atuinermik ullumikkumit 30 procentinik akikinnerusumik neqerooruteqarnissaq ajornanngitsoq, Palle Christiansen AG-mut taama oqarpoq.
Tele-Postip niuerfimmi unammillertigilersinnaasani tikilluaqquaa
- Tele-Post unammilleqatigiinnissamut piareersimalluinnarpoq, aamma nalunaarasuartaateqarnerup tamanut ammaanneqarnissaata inuiaqatigiinnut aningaasaqarnikkut sunniutigisinnaasaanik misissueqqissaarisoqarnissaa ilassilluarparput, pisortaaneq Søren Lennert Mortensen AG-mut taama oqarpoq.
Ingerlatseqatigiiffimmik nutaamik pilersitseqataasoq tassanilu pisortaasoq, tassaavoq Tele-Postimi teknikkeqarnermut pisortaasimasoq, Kim Schwartz, maanna Aalborgimi najugaqartoq.
Pilersitseqatigiit pingajuat tassaavoq Lars Andersen 'device manageritut' ukiuni qulingiluani misilittagaqartoq. Taanna Mexicomi ullumikkut najugaqarpoq. Palle Christiansen Tåstrupimi najugaqarpoq ingerlatseqatigiiffillu aamma tassani nalunaarsorneqarsimalluni.