Palle: Atuarfiit meeqqat pillugit napapput
Ilinniartitsisut kattuffianni, IMAK-imi siulittaasup Sivso Dorphip ilinniartitsisut ataatsimeeqattaarpallaarnerarlugit oqareerneratigut Palle Christiansen oqarpoq atuartut qitiutillugit allanngorartumillu ilinniartitsisinnaanermut ilinniartitsisut sulinissaminnut isumaqatigiissutaat malunnaatilimmik akornutaasoq.
- Ilinniartitsisut sulinissaminnut atatillugu isumaqatigiissutaat paasiuminaallunilu qeratangaarmat, atuartut qitiutillugit ilinniartitsiniarnermut akornutaasoq Palle Christiansenip oqaatigaa, angajoqqaallu amerlasuut meeqqamik iluamik atuartinneqanngitsoorsinnaanerat qaffasinnerusumillu ilinniagaqanngitsoorsinnaanerat annilaanngatigigaat aamma oqaatigalugu.
Akileraartarneq Atugarissaarnerlu pillugit isumalioqatigiissitap kaammattuutigisaasa inuiaqatigiit akornanni pitsanngorsaanissamut aqqutissiuussimmata, ilinniartitaaneq isumagineqarnerlu pitsanngorsarniarlugit atuarfinni pisutsit pillugit ammasumik oqaaseqartuartassalluni Palle Christiansen nalunaarpoq.
-Meeqqat ilinniartitaanerat ineriartornerallu salliutillugit isumaqatigiissuteqartoqartassaaq. Atuarfiit meeqqat pillugit napammata ilinniartitsisut kattuffiat IMAK meeqqat siunissaat pillugu ammasumik isumasioqataaqqullugu kaammattorpara, Ilinniartitaanermut Naalakkersuisoq Palle Christiansen oqarpoq.
