Palle: Atorfinitsitsiunnaarallarneq innuttaasunut eqquissanngilaq

Suliffeqarfinni Namminersorlutik Oqartussat ataaniittuni, soorlu KNR-imi suliffeqarfinnilu nammineerlutik ingerlasuni, soorlu Nukissiorfinni, atorfinitsisarneq unitsinneqarallarpoq.

- Taamaaliornerput pisariaqarluinnarpoq. Aningaasat atugassagut killeqarput, inissallu aamma pigisagut killeqarlutik, Palle Christiansen oqarpoq.

Namminersorlutik Oqartussani atorfiit initaqartinneqartut ima amigaataatigipput, allaat atorfinerlaat pingasut inissiami pingasunik sinittarfilimmi utaqqiisaagallartumik illoqatigiitinneqarsinnaasarlutik. Atorfinitsitsiunnaarallarnerli Namminersorlutik Oqartussat ataanni atorfilinnut tamanut atuutinngilaq.

Atorfiit ataasiakkaat inuiaqatigiinni pisariaqavissuunersut ataatsimiititaliap nalilersortassavai.

- Assersuutigalugu peqqinnissaqarfimmi nakorsamik immikkut ilinniarsimasumik amigaateqarpat, inissaqartinneqarpallu, taava soorunami atorfinitsinneqassaaq, aningaasaqarnermut naalakkersuisoq oqarpoq.

Kisianni atorfinitsitsiunnaarallarneq sulisooreersut ulapinnerulernerannik kinguneqariaannaavoq.

- Tassa Namminersulernerup akia. Namminersulerniarluta qinersigatta oqarnikuuvugut akisussaassusermik annerusumik tigusiniarluta. Aningaasaqarnittalu isikkua taamaatsillugu allaanerusinnaanngilaq, aningaasaqarnermut naalakkersuisoq oqarpoq.

Taamaakkaluartorli innuttaasunik sullissineq ajorseriassanngitsoq, Palle Christiansen neriorsuivoq.

- Innuttaasunut sullissineq ajorseriassanngilaq, tassami soraarsitsisoqarnianngilaq. Taamaallaat atorfinitsitsinissat atorfimmut ilaasumik initaqartinneqartut unitsinneqarallarput.

Namminersorlutik Oqartussat ingerlanneqarnerannut pingaaruteqarluinnartumik atorfinitsitsinianngikkutta inissaateqalernissatta tungaanut atorfinitsitseqqissanngilagut, Palle Christiansen oqarpoq.