Palin ullormusianik peqquserlussimanerarneqalerpoq
Aviisi ullormut saqqummersartumi, Washington Postimi, allaaserineqarpoq, ukiup affaa avillugu guvernøriunermini unnuani 312-ini aningaasat nerisassarsiutissaraluani Palinip atornerlussimagai, ilimagineqartutut angerlarsimaffimminit ungasissumi akunnittarfimmiinnani nammineq angerlarsimaffimminiiginnarsimalluni.
Sarah Palin tallimanik qitornaqarpoq, taakkulu arlaat ataaseq, arlallilluunniit, pisortatigoortumik angalaleraangami naalagaaffimmit akiliunneqartarnissaat guvermøriunermi nalaani piumasaqaatigisarsimavaa.
Palinip uia, Todd, nulii sinnerlugu angalassagaangami ullormusiassanik aamma piumasaqartarsimavoq.
Palinip ilaqutaasalu ullormusiarisarsimasaat katillugit 315.000 koruuniupput.
Sarah Palinip avammut oqaaseqartartua arnaq, aviisimut Washington Postimut oqarpoq, Palinip guvernøriunermini ullormusiarisartagarisimasai pissusissamisuuinnartuusut, angalanissaminullu aningaasartuutigisartagai pillugit sukannersunik inatsiseqarsimanngitsoq.