Palin torrallaasutut nalilerneqanngilaq

Palinip akissutai piviusorsiorpallaanngillat, tusagassiortullu apeqqutai avaqqutaarniarsarineqartut, Københavnimi Copenhagen Business Schoolimi lektorip Niels Bjerre-Poulsenip aalassassimaarutigaa:

- Piareersimanerulluni sassarsimanissaa naatsorsuutigigaluarpara. Ilinniartitama ilaat pitsasanerusumik akisinnaasimassagaluarput, Nels Bjerre-Poulsen aviisimut Politikenimut oqarpoq.

USA-p septembarip aqqarnanni 2001-imi saassunneqarnerata kingorna præsidentip George W. Buship oqaasii, maanna Bush Doktrinimik taaguuteqartut, pillugit Palin aperineqarami nalornilerpoq:

- Bush Doktrinip imarisai Sarah Palinip malunnavissumik ilisimasaqarfiginngilai, Bjerre-Poulsen oqarpoq.

USA-p nunanik USA-mut navianaateqarsinnaasunik saassussisinnaanissaa Bush Doktrinip pingaarnertut imaraa.